شہباز شریف کو لوٹی ہوئی دولت بچانے کی فکر ہے، شہباز گل

وزیر اعظم عمران خان کے معاون خصوصی برائے ابلاغ ڈاکٹر شہباز گل کا کہنا ہے کہ شہبازشریف کی ضمانت ثبوت ہے کہ پی ٹی آئی کی حکومت میں مجرموں کی ضمانتیں پسند ناپسند پر نہیں ہوتیں، شہباز شریف کو صرف لوٹی ہوئی دولت بچانے اور سیاست کی فکر ہے۔

ایک بیان میں شہباز گل نے کہا کہ شہباز شریف کو مخاطب کرتے ہوئے کہا کہ آپ کو جواب دینا ہے داماد اور بیٹوں کو سرکاری خرچ پر کیسے عیاشی کراتے رہے؟

انہوں نے کہا کہ جتنے ڈرامے کرلیں آپ کو جواب دینا ہے، 56 کمپنیوں سے کیسے ملکی معیشت پر ڈاکہ ڈالا۔

شہباز گل نے کہا کہ حکومت پاکستان کو طعنے مارنے سے پہلے دیکھ لیں دنیا بھر میں کورونا نے کیا تباہی مچائی ہے۔

معاون خصوصی نے کہا کہ اللّٰہ کے کرم اور وزیراعظم پاکستان کے بروقت فیصلوں نے پاکستان کو بڑی آفت سے محفوظ رکھا۔

انہوں نے کہا کہ کھرب پتی شریف خاندان کم از کم اپنا اسپتال ہی کورونا کے مریضوں کیلئے وقف کر دیتا۔