پنجاب، مویشی منڈیاں عید سے 15 روز پہلے شہروں سے 2کلومیٹر دور لگائی جائیں

 لاہور (خصوصی رپورٹر ) پنجاب کی کابینہ کمیٹی برائے انسداد کورونا کا اہم اجلاس ہفتہ کو وزیر اعلٰی آفس میں منعقد ہوا -اجلاس میں کورونا وباءکا پھیلاؤ روکنے کے لئے اقدامات کا جائزہ لیا گیا-اجلاس میں عیدالاضحیٰ کے لئے ایس او پیز کی تیاری اور دیگر ضروری انتظامات پر غورکیا گیا- عثمان بزدارنے کہا کہ مویشی منڈیاں عید سے 15 روز پہلے شہروں سے 2 کلومیٹر دور لگائی جائیں ، مویشی منڈیاں شہری حدود کے باہر لگانے کے انتظامات جلد مکمل کئے جائیں اور ایس او پیز کو جلد حتمی شکل دی جائے - اجلاس سے خطاب کرتے ہوئے وزیر اعلیٰ نے کہا کہ پنجاب حکومت سیوریج کے پانی میں وائرس کی موجودگی کا جائزہ لینے کے لئے پائلٹ پروگرام شروع کرے گی-پنجاب حکومت نے بہترین فیصلہ سازی کے لئے نامور طبی ماہرین پر مشتمل ٹیکنیکل ورکنگ گروپ تشکیل دیا- انہوں نے کہا کہ نیشنل کمانڈ اینڈ کنٹرول سنٹر نے گزشتہ 100 روز میں شاندار کارکردگی دکھائی ہے - نیشنل کمانڈ اینڈ کنٹرول سنٹرکے حکام مبارکباد کے مستحق ہیں - پنجاب حکومت نے ہر سطح پر وباءکا پھیلاؤ روکنے کے لئے موثر اقدامات کئے - میں ڈاکٹروں ، نرسوں اور پیرا میڈیکل سٹاف کی خدمات کو خراج تحسین پیش کرتا ہوں -