آپ آف لائن ہیں
جمعرات10؍ربیع الثانی 1442ھ26؍نومبر 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

کائنات کی ہر چیز اپنا اثر رکھتی ہے۔ تمام مظاہر فطرت سے نکلنے والی لہریں انسانی مزاج، رویوں اور سوچ پر اثر انداز ہوتی ہیں۔ انسان کے جسم میں توانائی کی لہریں موجزن رہتی ہیں۔ یہ برقی رو جذبات، خیالات اور عقائد پر مبنی ہوتی ہیں۔ انسانی جسم کی منفی و مثبت لہریں، اس کے اردگرد کے ماحول اور لوگوں کو متاثر کرتی ہیں، انھیں Chi Energy کہا جاتا ہے۔ اسی طرح گھر کے ماحول سے بھی توانائی کا اخراج ہوتا ہے۔

فینگ شوئی کا علم گھروں میں مثبت توانائی لانے اور منفی توانائی کو بھگانے کا کام کرتا ہے۔فینگ شوئی کا علم گھر، دروازوں، الماریوں اور اسٹورز میں غیر ضروری سامان کو مثبت توانائی کی راہ میں رکاوٹ سمجھتا ہے۔ فینگ شوئی گھروں میں مختصر فرنیچر اور کھلے ہوادار کمروں کی حوصلہ افزائی کرتا ہے،جہاں روشنی کا بہاؤ گھر کو کشادگی عطا کرتا ہے۔ ماحول کا انسان کے مزاج پر گہرا اثر ہوتا ہے، یہی وجہ ہے کہ چین اور جاپان میں گھروں کی عمارت سازی پر خاص توجہ دی جاتی۔ یہ گھر کھلے، ہوادار اور روشن ہوتے ہیں۔ فینگ شوئی کا لفظی مطلب ہوا اور پانی ہے۔ جب اسے گھر پر لاگو کیا جائے تو یہ ہمیں منفی توانائی کو مثبت میں تبدیل کرنے کا طریقہ بتاتا ہے۔ کوئی وجہ تو ضرور ہے کہ انٹیریر ڈیزائنرز برسوں سے اِس کے اصولوں پر عمل پیرا رہے ہیں۔

ایک جگہ پر توانائی کے بہاؤ سے تعلق رکھتا فینگ شوئی آپ کے گھر میں آسان حرکت اور مثبت تاثر پیدا کرنے کا ایک شاندار ذریعہ ہے، مگر اِس پر یقین رکھنے والے کہتے ہیں کہ یہ اِس سے کئی گنا زیادہ مددگار ثابت ہو سکتا ہے۔ اگر آپ درست تراکیب پر عمل کریں تو آپ دیکھیں گے کہ آپ کے گھر میں آنے والی دولت بڑھ گئی اور ایک خوبصورت اور کھلا ماحول تخلیق ہوا ہے۔ کیوں نہ آج ہم آپ کو ان تمام اہم تراکیب سے آگاہ کریں، جن کی آپ کو ضرورت ہو گی؟

پُر کشش داخلی راستہ

اگر آپ کے گھر کا بیرونی حصہ پُرکشش نہیں تو یہ مہمانوں کی پسند اور توجہ یا پیسے کو متوجہ نہیں کرے گا۔ اس لیے گھر کی تعمیر میں داخلی راستے کو انتہائی اہمیت دیں، اسے پرکشش، روشن اور گھر میں داخلے کے لیے رسائی میں آسان بنائیں۔ آپ کے گھر کے داخلی راستے کو اپنی طرف خوشیوں اور مثبت توانائی کو کھینچ لانا چاہیے۔ آسان مطلب یہ کہ بیرونی دروازے کی خوبصورتی اور نفاست کو کبھی نظر انداز نہ کریں۔

پانی ایک مرکزی عنصر

جب آپ یہ سوچنا شروع کریں کہ فینگ شوئی کے اصولوں کے لیے مثبت توانائی کا مسلسل بہاؤ کس طرح ضروری ہے، تو آپ کو سمجھ آ جائے گا کہ آپ کو اپنے گھر میں کہیں نہ کہیں پانی کو نمایاں کرنا ضروری ہے۔ گھر کے بیرونی حصے میں واٹر فیچرکو ضرور شامل کریں۔

رنگوں کی اہمیت

آپ کے گھر میں درست رنگوں کی آمیزش آپ کی زندگی میں پیسہ، توازن، خوشی اور مثبت توانائی لانے کا سبب بن سکتی ہے مگر یہ سب ان رنگوں پر منحصر ہے جو آپ چُنیں گے۔ سرخ، جامنی اور سبز مثبت رنگ ہیں، جو فینگ شوئی کی توانائی کے بہاؤ میں مددگار ثابت ہوتے ہیں اور ان کے استعمالات بےحساب ہیں۔ اس طرح، آپ کے گھرکی دیواروں، فرنیچر اور کپڑوں، غرض کہ سب ہی اشیا کو رنگ عطا کیے جا سکتے ہیں۔

پودے لگانا

گول پتوں یا سرخ پھولوں والے پودے آپ کے گھر میں دولت، توانائی، مثبت سوچ اور سکون کو کھینچ لانے کا بہترین ذریعہ ہیں۔ ان فوائد کے علاوہ بھی قدرت کی اس خوبصورتی کو گھر میں شامل کرنا ایک اچھا مشورہ ہے۔ دروازوں کے قریب پودوں کے ہونے سے ایک کمرے سے دوسرے کمرے میں توانائی کا بہاؤ آسان رہتا ہے۔

بیڈروم کا زاویہ

زیادہ تر خواب گاہیں مستطیل یا چوکور ہوتی ہیں، جو فینگ شوئی کے لیے بہترین شکل نہیں ہے۔ بہت سے زاویے اور کونے توانائی کا بہاؤ روک لیتے ہیں۔ سیدھے راستےاور آسانی سے گزرنے کی جگہیں، آپ کے گھر میں پیسے کی ترسیل میں مدد فراہم کرتی ہیں۔ اگر آپ بہت ساری اشیا کو بےترتیبی سے پھیلا کر راستے میں ڈال دیں گے، تو ایک اچھا تاثر قائم نہیں رہ سکتا۔اور آپ کے گھر کی بھرپور چمکنے کی صلاحیت بُری طرح متاثرہو سکتی ہے۔

ہوا کو اندر لائیں

تازہ ہوا کے لیے گھر کی تعمیر میں کھڑکیوں کو جگہ دینا نہ بھولیں۔ کھڑکیوں کوروزانہ کھولنا صحت و صفائی سے بڑھ کر ہے۔ یہ ہوا کو تازہ دم کرنے کے لیے بنیادی عنصر ہے۔ موسم ِ سرما میں بھی آپ کو کھڑکیوں کو روزانہ کھولنا چاہیے۔ پردے ہٹا کر سورج کی روشنی کو بھی اندر آنے دیں۔ سورج کی روشنی اور تازہ ہوا آپ کے دوست ہیں کیونکہ یہ گھر سے منفی توانائی لے جانے کا باعث بنتے ہیں۔

ہوادار بیٹھک

بیٹھک یا لیونگ روم ایسی جگہ ہوتی ہے، جہاں گھر کے افراد اور مہمان بیٹھ کر خوش گپیاں کرتے ہیں۔ بیٹھک کوگھر میں ایسی جگہ ہونا چاہیے، جہاں قدرتی روشنی کا گزر ہوتا ہو۔ فرنیچر کی سجاوٹ میں بھی صوفے کو دیوار کے ساتھ رکھنا بہتر سمجھاجاتا ہے۔ کرسیاں یا ٹیبل ایسی جگہ نہ رکھیں، جہاں وہ دروازے یا آنے جانے میں رکاوٹ پیدا کرنے کا باعث بنیں۔