آئی فون 12 پرو میکس اور منی منظر عام پر آگئے

15 اکتوبر ، 2020

معروف ٹیکنالوجیکل کمپنی ایپل کے آئی فون 12 اور اس کے دیگر ورژنز سامنے آگئے جس میں کمپنی نے اس میں بہترین ٹیکنالوجی کا استعمال کیا ہے۔

غیر ملکی ویب سائٹ پر شائع رپورٹ کے مطابق کمپنی نے کورونا وائرس کے باعث لگائے گئے لاک ڈاؤن کی وجہ سے تاخیر کے بعد سال 2020 کے اپنے نئے فونز متعارف کروادیے۔

ان نئے فونز میں آئی فون 12 منی، آئی فون 12، آئی فون 12 پرو اور آئی فون 12 پرو میکس شامل ہیں۔

میڈیا رپورٹس کے مطابق آئی فون 12 منی شاید ایک عام آدمی خرید سکے لیکن آئی فون 12 پرو میکس بہت ہی مہنگے ہیں۔

ایپل کی اپنی ویب سائٹ پر آئی فون 12 موبائل فون کی قیمت ٹریڈ سے قبل 799 امریکی ڈالر بتائی جارہی ہے جبکہ آئی فون 12 منی کی قیمت 699 امریکی ڈالر بتائی جارہی ہے۔

ان نئے موبائل فونز میں سپر ریٹینا ایکس ڈی آر ڈسلپے اور ہائی ڈائنمک رینج (ایچ ڈی آر) کو شامل کیا گیا ہے۔

اس ڈسلپے کے بارے میں ایپل کا دعویٰ ہے کہ یہ اب تک کے اسمارٹ فونز میں سب سے بہترین ٹیکنالوجی استعمال کی گئی ہے۔

آئی فون 12 منی اور میکس پرو دونوں میں ہی ایپل کا سب سے بہترین پروسیسر اے 14 منی استعمال کیا گیا ہے۔

اس پروسیسر چپ کے بارے میں بھی ایپل کا دعویٰ ہے کہ یہ اب تک موبائل اسمارٹ فون میں استعمال ہونے والی سب سے بہترین چپ ہے۔

اپنے نئے موبائل فونز کو ایپل نے فائیو جی ٹیکنالوجی سے لیس کیا ہے اور اب یہ موبائل فونز 5G انٹرنیٹ سروس چلانے کے بھی قابل ہیں۔

ان نئے موبائل فونز کے فرنٹ کیمرہ سے بھی ایچ ڈی آر خصوصیت کی تصویر کھینچی جاسکتی ہے۔

اس کے ساتھ ساتھ ان موبائل فونز میں سیرامِک شیلڈ کا بھی استعمال کیا گیا ہے جو اس موبائل فون کی اسکرین کو نہ صرف مضبوط بنادیتا ہے بلکہ ہاتھ سے زمین پر گر کرکے خراب ہونے سے بھی محفوظ بنادیتا ہے۔

آئی فون کے نئے موبائل فونز آئی پی 68 ریٹڈ ہیں، جس کا مطلب ہے کہ یہ 6 میٹر تک پانی میں 30 منٹ بغیر نقصان پہنچے رہ سکتا ہے۔

کمپنی نے اپنے نئے تمام موبائل فونز میں میگ سیف ایسیسریز کا استعمال کیا ہے جبکہ چارجنگ کرنے کی خاطر موبائل فونز کے لیے وائر لیس چارجر بنایا گیا ہے۔

کہا جارہا ہے کہ میگ سیف نے وائرلیس چارجر کی خصوصیات میں مزید اضافہ کیا ہے، جبکہ اس نے اپنی ایسیسریز میں مقناطیسی بنیاد کا استعمال کیا ہے تاکہ انھیں موبائل فون سے جوڑا جاسکے۔

تازہ ترین