پاکستانی ڈرامہ انڈسٹری کی اُبھرتی اداکارہ اریبہ حبیب کا ترکش ڈرامے ’دیلیش ارطغرل غازی‘ سے متعلق کہنا ہے کہ اگر پاکستا ن میں ارطغرل جیسا ڈرامہ بنایا گیا تو اس پر پابندی لگ جائے گی۔
ماڈل واداکارہ اریبہ حبیب نے ایک یوٹیوب چیٹ شو میں بطور مہمان شرکت کی، اس دوران انہوں نے پاکستان میں نہایت مقبول ترکش مواد سے متعلق بات کرتے ہوئے کہا کہ ’آج کل پاکستان میں تُرک ڈرامہ ارطغرل بہت دیکھا جا رہا ہے، پاکستانی شائقین ارطغرل کی کاسٹ کو پسند کر رہے ہیں اور ترک اداکاروں کو پاکستان کے بڑے بڑے برانڈ میں کام بھی مل رہا ہے۔‘
اریبہ حبیب کا پاکستان کے شائقین کی دلچسپی اور نظریئے سے متعلق بات کرتے ہوئے کہنا تھا کہ ’پاکستانی معاشرہ ڈراموں سے متعلق کچھ مخصوص مواد کے علاوہ دیکھنا پسند نہیں کرتا ہے، پاکستان میں مختلف مواد کو قبول نہیں کیا جاتا ہے۔‘
انہوں نے ڈرامہ سیریل ارطغرل کی مثال د یتے ہوئے کہا کہ ’ارطغرل ڈرامے کی تعریف ہر کوئی کر رہا ہے لیکن اُس ڈرامے میں جیسا لباس اور ڈائیلاگز ہیں اس قسم کا مواد اگر ہم بنانے کی کوشش کریں گے تو اس پر پابندی لگ جائے گی۔‘