اپوزیشن اتحاد کا شیرازہ بکھر رہا ہے، عثمان بزدار

وزیراعلیٰ پنجاب عثمان بزدار نے کہا کہ اپوزیشن کا شرانگیز بیانیہ بری طرح پٹ چکا ہے، ملکی وقار کے منافی رویے کی وجہ سے اپوزیشن اتحاد کا شیرازہ بکھر رہا ہے۔

وزیراعلیٰ پنجاب عثمان بزدار سے وزیراعظم عمران خان کے معاون خصوصی عثمان ڈار نے ملاقات کی ہے جس میں وزیراعظم کے”کامیاب جوان پروگرام“ اور ٹائیگرز فورس کے امور پر بات چیت ہوئی اور اپوزیشن کے اداروں کے خلاف بیان بازی کی مذمت بھی کی گئی۔

عثمان ڈار سے ملاقات کے دوران وزیراعلیٰ پنجاب عثمان بزدار نے کہا کہ سابق دور میں حکمرانوں نے نوجوانوں کو نظر انداز کیا۔

وزیر اعلیٰ پنجاب کا عوام کو ایک کی بجائے 2 کلو چینی دینے کا حکم

وزیراعلیٰ پنجاب نے دیپالپور سہولت بازار میں آٹے ، چینی ،گوشت چکن، انڈے اور دیگر اشیا کے اسٹالز کا معائنہ کیا، ان کا کہنا تھا کہ سہولت بازار میں 20 کلو آٹے کا تھیلا 845 روپے اور چینی 81 روپے کلو فراہم کی جارہی ہے ، وہ عوام کی خدمت کیلئے ہر وقت حاضر ہیں۔

عثمان بزدار نے یہ بھی کہا کہ اداروں کے خلاف باتیں کرنے والے پہلے کی طرح آئندہ بھی ناکام رہیں گے، اپوزیشن کے پاس کوئی پروگرام ہے نہ ایجنڈا۔

وزیراعلیٰ پنجاب عثمان بزدار کا کہنا تھا کہ اپوزیشن جو مرضی کر لے، لوٹ مار کا حساب دینا ہی پڑے گا کیونکہ پاکستان کو آگے لے جانے کے لیے چوروں اور لٹیروں کا احتساب ضروری ہے۔