کورونر نے سمارٹ موٹرویز پر نظرثانی کا مطالبہ کر دیا

آج کا اخبار

یورپ سے

20 جنوری ، 2021

لندن ( پی اے ) ایک کورونر نے ایم ون کے ایک حصے پر دو افراد کی ہلاکت کی انکوئسٹ میں یہ سننے کے بعد کہ ان کو مرنے سے بچایا جا سکتا تھا سمارٹ موٹر ویز پر نظرثانی کا مطالبہ کر دیا۔ 44 سالہ جیسن میرسر اور 22 سالہ الیگزینڈررو مرگانو اس وقت ہلاک ہوئے تھے جب 7 جنوری 2019 کو پریزمیسلا سوزوبا نے اپنی لاری شیفلڈ کے قریب ان کی گاڑیوں سے ٹکرا دی تھی۔کورونر ڈیوڈ ارپتھ نے کہا کہ کیا ہارڈ شولڈر کے بغیر سمارٹ موٹرویز مستقبل میں اس نوعیت کی ہلاکتوں سے بچنے میں کردار ادا کر سکتی ہیں۔ ہائی ویزانگلینڈ کا کہنا ہے کہ وہ اٹھائے گئے بہت سے نکات پر توجہ مرکوز کر رہا ہے۔ انہوں نے مزید کہا کہ وہ ہائی ویز انگلینڈ اور سیکرٹری ٹرانسپورٹ کو اس سلسلے میں نظرثانی کرنے کیلئے لکھ رہے ہیں۔ انکوائری کو بتایا گیا کہ اگرایم ون کے جس حصے پر جہاں حادثہ ہوا وہاں ایک شولڈر ہوتا تو ان دونوں افراد کی ہلاکتوں سے بچا جا سکتا تھا۔ ہارڈ شولڈر کو ایک ایکٹیو لین میں تبدیل کر دیا گیا تھا۔ لاپروائی سے ڈرائیونگ میں دو افراد کی ہلاکت کا اعتراف کرنے کے بعد 40 سالہ سوزوبا کو گذشتہ سال جیل بھیج دیا گیا تھا۔ وہ انکوئسٹ کے دوران جیل سے فون پر سوالات کے جواب دے رہا تھا۔ اس نے انکوئسٹ کو بتایا کہ اس نے اعتراف کیا تھا کہ جب یہ حادثہ پیش آیا تھا تو اس وقت وہ مناسب توجہ دیئے بغیر ڈرائیونگ کر رہا تھا۔ میرے لئے یہ آزمائش کا وقت ہے۔ اس نے مزید کہا کہ اگر موٹر وے کے اس حصے پر ہارڈ شولڈر ہوتا تو اس تصادم سے بچا جا سکتا تھا جس میں دو افراد کی جا چلی گئی ۔ ہارڈ شولڈر ہوتا تو میں ان دونوں کاروں کو پیچھے چھوڑ دیتا اور ہم سب ہی محفوظ طریقے سے اپنے گھروں کوواپس پہنچ سکتے تھے۔ سوزوبا نے کہا کہ میرے پاس رسپانس کیلئے صرف تین سے پانچ سیکنڈ کا وقت تھا۔ جب اس سے پوچھا گیا کہ اگر اس کی پوری توجہ ڈرائیونگ پر ہوتی تو اس حادثے سے بچا جا سکتا تھا تو اس نے جواب دیا کہ اب سب کچھ ہونے کے بعد اس سلسلے میں کچھ کہنا مشکل ہے۔ سائوتھ یارکشائر پولیس کیلئے میجر کولیژن انویسٹی گیشنز کی نگرانی کرنے والے سارجنٹ مارک بریڈی نے انکوئسٹ میں بتایا کہ اگر کوئی ہارڈ شولڈر ہوتا تو جیسن اور الیگزینڈر اپنی کاریں اس ہارڈ شولڈر کی جانب لے جاتے اور میرے رائے میں سوزوبا بالکل صفائی سے وہاں سے گزر جاتا لیکن سوزوبا نے حادثے کی بنیادی وجہ قبول کی کہ اس کی پوری توجہ سڑک پر نہیں تھی۔ اس ہلاکت خیز حادثے کے بعد میرسر کی بیوہ کلیری نے سمارٹ موٹر ویز کے خلاف مہم چلائی۔ ایک بیان میں ہائی ویز انگلینڈ نے کہا کہ ہم سڑکوں کو زیادہ سے زیادہ حد تک محفوظ بنانے کی کوشش کرنے کیلئے پرعزم ہیں ۔ ہم پہلے ہی ایسے بہت سے نکات پر توجہ مرکوز کیے ہوئے ہیں جو کورونر نے انکوئسٹ میں اٹھائے ہیں جیسا کہ مارچ 2020 میں حکومت کے اسمارٹ موٹروے ایویوڈینس، اسٹاک ٹیک اور ایکشن پلان میں بتایا گیا ہے۔ رپورٹ موصول ہونے کے بعد ہم کورونر کی جانب سے کئے گئے کمنٹس پر غور کریں گے۔

تازہ ترین