پولیس کے انتباہی اعلانات کے باوجود بسنت ، ہوائی فائرنگ

میرا شہر

اسلام آباد

19 فروری ، 2021

راولپنڈی(سٹاف رپورٹر) راولپنڈی پولیس نے بسنت منانے والوں کے خلاف کارروائی کے لئے ڈرون و دیگر کیمروں کے ذریعے پتنگ بازوں کی مانیٹرنگ کی ،اس سلسلے میں جمعرات کی شام کو شہراورکینٹ کے بعض علاقوں میں بسنت منائی گئی جس کوروکنے کے لئے پولیس حکام نے جمعرات کو انتباہی اعلانات کاسلسلہ بھی جاری رکھا اوراس حوالے سے پولیس گاڑیوں کے ذریعے اعلانات کئے گئے جب کہ مساجدکے سپیکروں پراس حوالے سے اعلان کئے گئے جن میں کہاگیا کہ پتنگ بازی خطرناک کھیل ہے جو جانی نقصان کا باعث بن سکتا ہے ،شہری پتنگ بازی سے اجتناب کریں بصورت دیگر قانون کے مطابق کارروائی کیجائے گی جس چھت سے پتنگ بازی ہو رہی ہے اس عمارت کے مالک یا گھر کے سربراہ کے خلاف بھی مقدمہ درج کیا جائے گا۔ پولیس حکام نےوالدین سے بھی اپیل کی ہے کہ وہ آگے بڑھیں اور پتنگ بازی کی روک تھام میں کردار ادا کر کے ذمہ دار شہری ہونے کا ثبوت دیں، جب کہ عوام سے کہاگیاہے کسی بھی علاقے میں پتنگ بازی اور ہوائی فائرنگ کی رپورٹ کرنے کے لئے پکار 15 پر کال کریں۔جمعرات کی رات شہراورکینٹ کے مختلف علاقوں میں بسنت منائی گئی اس دوران گھروں کی چھتوں پرلائٹنگ کرکے پتنگ بازی ،ہوائی فائرنگ اور آتش بازی کی جاتی رہی جب کہ بعض مقامات پرلاؤڈسپیکراستعمال کرنے کی شکایات بھی سامنے آئیں ۔ڈھوک سیداں ،ٹینچ بھاٹہ ،مغل آباد بکرامنڈی ،صدرطارق آباد ،ٹاہلی موہری ،چاکرہ روڈ،فضل ٹاؤن ،صادق آباد،مسلم ٹاؤن ،علامہ اقبال کالونی ، آریہ محلہ ،اڈیالہ روڈسمیت کئی علاقوں میں رات گئے ہوائی فائرنگ ہوتی رہی۔ ایس ایس پی آپریشنز شعیب محمود اور ایس پی پوٹھوہار کی زیرنگرانی سرویلنس ٹیمیں ڈرونز اور دیگر کیمروں کی مدد سے پتنگ بازوں کی ویڈیو مانیٹرنگ بھی کر رہی ہیں۔

تازہ ترین