پنجاب میں شادی کی تقریبات پر مکمل پابندی عائد، بزدار

حکومت پنجاب نے کورونا مثبت کیسز کے 12 فیصد سے زائد شرح والے اضلاع میں موثر لاک ڈاؤن کا فیصلہ کیا ہے، یکم اپریل سے شادی کے اجتماعات پر مکمل پابندی عائد ہوگی جبکہ دکانیں شام 6 بجے بند کرنا ہوں گی۔

وزیراعلی پنجاب سردار عثمان بزدار کی زیر صدارت انسداد کورونا کابینہ کمیٹی اجلاس ہوا جس کے بعد انہوں نے معاون خصوصی فردوس عاشق اعوان کے ہمراہ پریس کانفرنس کی اور بتایا کہ ہم کورونا وائرس کی تیسری خطرناک لہر کا مقابلہ کر رہے ہیں۔

عثمان بزدار کا کہنا ہے کہ صوبے بھر میں معاشی انڈسٹریز پر کوئی پابندی نہیں لگائی جارہی، صنعتوں میں ایس او پیز کے ساتھ کام جاری رکھیں گے،ہفتے میں دو دن کاروبار مکمل بند رہے گا، ہوٹلوں ، ریسٹورنٹ کو صرف ہوم ڈیلیوری اور ٹیک اوے کی اجازت ہوگی۔

انہوں نے بتایا کہ صوبے میں میٹرو، اورنج ٹرین اور اسپیڈو بسیں بند رہیں گی، کھیلوں، سماجی و ثقافتی سرگرمیوں پر بھی پابندی ہوگی ، پارکس بند رکھے جائیں گے۔

صوبے میں صنعتیں ، تعمیرات کا شعبہ اور ٹرانسپورٹ ایس او پیز کے تحت کام جاری رکھیں گے ، نئی پابندیوں کا اطلاق 11اپریل تک ہوگا۔

لاہور، ماسک نہ پہننے کاجرم قابل ضمانت ہے، پولیس

صوبائی دارالحکومت لاہور میں ماسک نہ پہننے پر درج مقدمہ میں شامل جرم قابل ضمانت ہے۔

وزیر اعلیٰ نے بتایا کہ اس وقت پنجاب میں تیسری لہر کی وجہ سے اسپتال مریضوں سے بھر رہے ہیں، ہیلتھ سسٹم پر دباؤ بڑھ رہا ہے، کورونا مثبت کیسز کا مجموعی تناسب 14 فیصد ہوچکا ہے، لاہور میں 24 گھنٹوں میں مثبت کیسز کی شرح 21 فیصد رہی ہے۔

انہوں نے بتایا کہ کورونا کے دو لاکھ سے زائد مثبت کیسز ہیں، اب تک پنجاب میں کورونا سے 6 ہزار سے زائد اموات ہوچکی ہیں، جبکہ گزشتہ 24 گھنٹوں میں کورونا سے 39 اموات ہوئیں۔