ہم ECL کا اقدام چیلنج کرنے جا رہے ہیں،عطا تارڑ

24 مئی ، 2021

مسلم لیگ نون کے رہنما عطا تارڑ کاکہنا ہے کہ ہم پارٹی کے صدر شہباز شریف کا نام ای سی ایل میں ڈالنے کا حکومتی اقدام چیلنج کرنے جا رہے ہیں۔

رہنما نون لیگ عطا تارڑ نے شہباز شریف کے وکیل امجد پرویز کے ہمراہ احاطۂ عدالت میں گفتگو کرتے ہوئے بتایا کہ توہین عدالت کی درخواست پر اپنا حق محفوظ رکھتے ہیں، کورونا وبا کے باعث توہین عدالت کی درخواست رجسٹرار آفس نے قبول نہیں کی تھی۔

اس موقع پر شہباز شریف کے وکیل امجد پرویز نے کہاکہ وفاقی حکومت نے بدنیتی سے شہبازشریف کا نام ای سی ایل میں ڈالا ہے، کیس زیر سماعت ہونے اور عدالتی احکامات کے باوجود نام ای سی ایل میں ڈالا گیا ہے۔

امجد پرویز کا کہنا تھا کہ حکومتی اقدام کو چیلنج کرنے کا سائل کو قانونی حق حاصل ہے،ہم نے خود عدالت سے استدعا کی کہ اپنی درخواست واپس لینا چاہتے ہیں۔

وکیل امجد پرویز نے بتایا کہ ہم درخواست واپس لےکر متعلقہ فورم سے رجوع کریں گے۔

واضح رہے کہ لاہور ہائی کورٹ نے شہباز شریف کی توہین عدالت اور عدالتی فیصلے پرعمل درآمد کی درخواستیں واپس لینےکی استدعا منظور کرلی، جبکہ وفاقی حکومت کے وکیل نے درخواست واپس لینے کی مخالفت کی۔

سرکاری وکیل نے کہاکہ عدالت حکومت کا جواب آنے اور اپنے اطمینان تک درخواست واپس لینےکی اجازت نہ دے۔

تازہ ترین