فرمان الہی
نماز کے اوقات
سندھ کابینہ نے پینشن اصلاحات کی اصولی منظوری دے دی، اصلاحات کے مطابق سندھ حکومت کے ملازمین کی جلد ریٹائرمنٹ پر پابندی ہو گی۔
کراچی میں وزیرِ اعلیٰ سندھ مراد علی شاہ کی زیرِ صدارت ہونے والے سندھ کابینہ کے اجلاس میں پینشن اصلاحات کی اصولی منظوری دی گئی، اصلاحات سے خزانے کو اربوں روپے کی بچت ہو گی۔
ریٹائرمنٹ کیلئے کم سے کم 25 سال سروس اور 55 سال عمر لازمی ہو گی، اصلاح شدہ پینشن اسکیم کا اطلاق نئے بھرتی کیئے جانے والے ملازمین پر ہو گا۔
اجلاس میں دی گئی بریفنگ میں بتایا گیا کہ سندھ حکومت کے ملازمین کی تعداد 4 لاکھ 93 ہزار 182 ہے، جبکہ سندھ حکومت کے ملازمین ماہانہ 23 ارب 90 کروڑ روپے تنخواہ لیتے ہیں۔
اجلاس کو بریفنگ میں بتایا گیا کہ اصلاحات سے 112 ارب 17 کروڑ روپے کا بوجھ کم ہو جائے گا، اصلاح شدہ پینشن اسکیم کا اطلاق اب نئے بھرتی ہونے والے ملازمین پر ہو گا۔
وزیرِ اعلیٰ سندھ مراد علی شاہ نے اجلاس سے خطاب کرتے ہوئے بتایا کہ سندھ حکومت کا ماہانہ پینشن بل 13 ارب 30 کروڑ روپے ہے، ہمیں اصلاحات کرنی ہیں تاکہ پینشن بل کم ہو۔
انہوں نے کہا کہ یہی صورتِ حال رہی تو 10 سال بعد پینشن کا بل سیلری کے بل سے بڑھ جائے گا۔
ترجمان وزیرِ اعلیٰ سندھ کے مطابق سندھ کابینہ کے اجلاس میں مختلف تجاویز پر غور کیا گیا۔
سندھ کابینہ نے منظوری دی کہ فیملی پینشن فوری طور پر فیملی ممبران بیوی یا بیویوں، شوہر اور 21 سال سے کم عمر کے بیٹے تک محدود ہو گی۔
