قومی اسمبلی میں کل جو ہوا بڑا افسوسناک ہے، چوہدری محمد سرور

گورنر پنجاب چوہدری محمد سرور نے گزشتہ روز قومی اسمبلی میں پیش آئے واقعے کی مذمت کرتے ہوئے کہا کہ قومی اسمبلی میں کل جو ہوا بڑا افسوس ناک ہے۔

انہوں نے کہا کہ ارکان اسمبلی لاکھوں ووٹ لے کر اسمبلی میں آتے ہیں، اسمبلی میں ان کے رویہ سے ان کی ساکھ کو نقصان پہنچتا ہے۔

چوہدری محمد سرور نے کہا کہ تمام سیاسی جماعتوں کےلوگوں کو ذمہ دارانہ رویہ اپنانا ہو گا، قومی اسمبلی میں کل جو ہوا بڑا افسوسناک ہے۔

قومی اسمبلی ہنگامہ، ملوث ارکان کا ایوان میں داخلہ بند ہوگا

قومی اسمبلی میں گزشتہ روز پیش آئے واقعات کا جائزہ لینے کے لیے اسپیکر قومی اسمبلی نے اجلاس طلب کر لیا، سی سی ٹی وی اور دستیاب ویڈیو کا جائزہ لیا جائے گا ، تحقیقات کی روشنی میں ارکان کے ایوان میں داخلے پر پابندی لگائی جائے گی۔

واضح رہے کہ قومی اسمبلی میں گزشتہ روز بھی وزراء اور حکومتی ارکان نے اپوزیشن لیڈر شہباز شریف کی تقریر کے دور ان شدید احتجاج ، شور شرابہ اورہنگامہ کیا جس کے باعث ایوان میدان جنگ بن گیا۔

حکومتی رکن علی نواز اعوان نے بجٹ دستاویز لیگی رہنما روحیل اصغر کو دے ماری ، دونوں کے درمیان سخت جملوں کا تبادلہ ہوا، ہنگامہ آرائی کے دوران تحریک انصاف کی رکن اسمبلی ملیکہ بخاری چہرے پر کتاب لگنے سے زخمی ہوگئی تھیں۔