فرمان الہی
نماز کے اوقات
مزاح کی دنیا کے بے تاج بادشاہ اور لیجنڈ اداکار عمر شریف کی میت آج جرمنی سے براستہ استنبول کراچی کیلئے بھیجی جائے گی۔
عمر شریف کی میت نیورمبرگ سے پہلے میونخ منتقل کی جائے گی، جہاں سے ترکش ایئر کی پرواز سے میت استنبول پہنچائی جائے گی۔
عمر شریف کی میت کل صبح 5 بجکر 45 منٹ پر ترکش ایئرلائن سے کراچی پہنچائی جائے گی۔
سی اے اے نے کراچی ایئر پورٹ کے کارگو ٹرمینل پر انتظامات مکمل کرلیے ہیں، عمر شریف کی میت ایئر پورٹ سے ایدھی سردخانے منتقل کی جائے گی، عمر شریف کو عبداللٌٰہ شاہ غازی مزار سے متصل قبرستان میں سپرد خاک کیا جائے گا۔
واضح رہے کہ لیجنڈ کامیڈین عمر شریف طویل علالت کے بعد جرمنی کے اسپتال میں انتقال کر گئے تھے۔
اداکار عمر شریف 4 روز تک جرمنی کے اسپتال میں داخل رہے، انہیں کراچی سے واشنگٹن علاج کیلئے پہنچایا جارہا تھا لیکن ناساز طبیعت کے باعث انہیں جرمنی کے اسپتال میں ہی داخل کردیا گیا تھا۔
لیجنڈری اداکار و کامیڈین عمر شریف کافی عرصے سے عارضہ قلب، گردے اور دیگر مختلف بیماریوں میں مبتلا تھے۔
عمر شریف نے اپنے کیریئر کا آغاز 1974میں 14سال کی عمر میں اسٹیج اداکاری سے کیا تھا اور 1980 میں پہلی مرتبہ آڈیو کیسٹ پر اپنا ڈرامہ ریلیز کیا تھا۔
عمر شریف ٹی وی و اسٹیج اداکار اور فلم ڈائریکٹر کے طور پر جانے جاتے تھے، انہوں نے اسٹیج و تھیٹر میں سرحد پار بھی بہت مقبولیت حاصل کی تھی۔
کامیڈین اداکار نے تقریباً 5 دہائیوں تک شوبز میں کام کیا اور درجنوں ڈراموں، اسٹیج تھیٹرز اور لائیو پروگرامز میں پرفارم کیا۔
