فرمان الہی
نماز کے اوقات
نیورمبرگ بلدیہ نے عمر شریف کا سرکاری ڈیتھ سرٹیفکیٹ جاری کردیا، عمر شریف کی میت بیوہ اور سفارتی عملے کے حوالے کردی گئی ہے۔
سفارتی ذرائع کے مطابق پاکستانی کمیونٹی اور سفارتی عملہ میت کے غسل و کفن میں مصروف ہے۔ میت کی پاکستان روانگی کے لئے ابھی تک تصدیق نہیں ہو سکی، میت کی آج روانگی کی کوشش کی جارہی ہے ورنہ کل بھجوائی جائے گی۔
سفارتی ذرائع کا کہنا ہے کہ ترکش مسجد نیورمبرگ میں عمر شریف کی نماز جنازہ آج ادا کی جائے گی، پاکستانی اور دیگر ملکوں کے شہریوں کی بڑی تعداد نماز جنازہ کے لئے موجود ہیں۔
عمر شریف کی اہلیہ زریں غزل نے جیو سے بات چیت کرتے ہوئے کہا کہ نیورمبرگ میں عمر شریف کی میت کو پاکستانی شہری امجد علی نے غسل دیا، غسل کفن کے بعد عمر شریف کی میت ترکش مسجد روانہ کردی ہے۔
زریں غزل کا مزید کہنا تھا کہ کورونا وائرس کا ٹیسٹ کرانے آئی ہوں، کل کی فلائٹ کی روانگی کی تیاری ہے۔
واضح رہے کہ لیجنڈ کامیڈین عمر شریف طویل علالت کے بعد جرمنی کے اسپتال میں انتقال کر گئے تھے۔
اداکار عمر شریف 4 روز تک جرمنی کے اسپتال میں داخل رہے، انہیں کراچی سے واشنگٹن علاج کیلئے پہنچایا جارہا تھا لیکن ناساز طبیعت کے باعث انہیں جرمنی کے اسپتال میں ہی داخل کردیا گیا تھا۔
لیجنڈری اداکار و کامیڈین عمر شریف کافی عرصے سے عارضہ قلب، گردے اور دیگر مختلف بیماریوں میں مبتلا تھے۔
خیال رہے کہ عمر شریف نے اپنے کیریئر کا آغاز 1974میں 14سال کی عمر میں اسٹیج اداکاری سے کیا تھا اور 1980 میں پہلی مرتبہ آڈیو کیسٹ پر اپنا ڈرامہ ریلیز کیا تھا۔
عمر شریف ٹی وی و اسٹیج اداکار اور فلم ڈائریکٹر کے طور پر جانے جاتے تھے، انہوں نے اسٹیج و تھیٹر میں سرحد پار بھی بہت مقبولیت حاصل کی تھی۔
کامیڈین اداکار نے تقریباً 5 دہائیوں تک شوبز میں کام کیا اور درجنوں ڈراموں، اسٹیج تھیٹرز اور لائیو پروگرامز میں پرفارم کیا۔
اداکار عمر شریف کی بیوہ زریں غزل نے ویڈیو پیغام میں عمر شریف کی نماز جنازہ پڑھانے کی درخواست عالم دین مفتی تقی عثمانی سے کی تھی جو انہوں نے قبول کرلی ہے۔
زریں غزل نے پاکستان اور بھارت سے ملنے والی دعاؤں پر سب کا شکریہ ادا کیا۔
