پاکستان دہشت گردی کے خلاف عالمی جنگ میں فرنٹ لائن اسٹیٹ ہے، چین

29 جون ، 2017

بیجنگ(مانیٹر نگ سیل)چین نے بھارتی وزیراعظم نریندر مودی اور امریکی صدر ڈونلڈ ٹرمپ کے مشترکہ اعلامیہ میں دہشت گردی کے حوالے سے بیان پر رد عمل کا اظہار کرتے ہوئے کہا کہ پاکستان دہشت گردی کے خلاف عالمی جنگ میں فرنٹ لائن اسٹیٹ ہے اور عالمی برادری اس ضمن میں پاکستان کی کاوشوں کا اعتراف کرے۔

چینی وزارت خارجہ کے ترجمان لو کانگ نے صحافیوں سےبات کرتے ہوئے کہا کہ چین دہشت گردی کی ہر قسم کی مذمت کرتا ہے اور ہم یہ بھی واضح کرچکے ہیں کہ ہم دہشت گردی کو مخصوص ممالک سے جوڑنے کی بھی مخالفت کرتے ہیں۔

چینی وزارت خارجہ کے ترجمان نے مزید کہا کہ بیجنگ سمجھتا ہے کہ انسداد دہشت گردی کے حوالے سے عالمی تعاون کو بڑھانا چاہیے اور عالمی برادری کو چاہیے کہ وہ اس ضمن میں پاکستان کی جانب سے کی جانے والی کوششوں کو تسلیم کرے اور اس کا اعتراف کرے۔

بھارت امریکا تعلقات کے حوالے سے لو کانگ نے کہا کہ چین ممالک کے درمیان دوستانہ تعلقات کے فروغ کو سراہتا ہے اور سمجھتا ہے کہ ایسے تعلقات خطے کے امن و استحکام کو برقرار رکھنے میں مثبت اور تعمیری کردار ادا کرتے ہیں۔

واضح رہے کہ نریندر مودی اور امریکی صدر ڈونلڈ ٹرمپ کے درمیان ہونے والی ملاقات کے بعد جاری ہونے والے اعلامیے میں پاکستان سے مطالبہ کیا گیا تھا کہ وہ اپنی سرزمین دہشت گردی کے لیے استعمال ہونے سے روکے۔

تازہ ترین