ہم اُٹھتے ہیں اور فتح اپنے نام کرتے ہیں: شرمیلا فاروقی

October 25, 2021

پاکستان پیپلز پارٹی کی رہنما اور رکن سندھ اسمبلی شرمیلا فاروقی نے پاکستان کی تاریخی فتح پر ٹیم اور قوم کو مبارکباد دی ہے۔

سوشل میڈیا پر جاری کیے گئے پیغام میں شرمیلا فاروقی نے کہا کہ ’کل کی تاریخی فتح سے ایک مضبوط قوم کی مضبوط ٹیم نے دُنیا کو مثبت پیغام دیا ہے۔‘

شرمیلا فاروقی نے پاکستانی عوام کی تعریف کرتے ہوئے کہا کہ ’ہم اُٹھتے ہیں، چمکتے ہیں اور فتح اپنے نام کرتے ہیں، ایسا ہے پاکستان اور یہاں کے لوگ۔‘

آخر میں گرین شرٹس اور پوری قوم کو بھارت کی شکست پر مبارکباد بھی پیش کی۔

واضح رہے کہ گزشتہ شب پاکستان نے ورلڈکپ مقابلوں میں بھارت سے شکست کا جمود توڑ کر اسے چاروں شانے چت کرتے ہوئے 10 وکٹوں سے ہرادیا۔

بھارت کا 152 رنز کا دیا گیا ہدف پاکستان نے بغیر کسی نقصان پر 18ویں اوور میں حاصل کرلیا۔

محمد رضوان نے شاندار بیٹنگ کا مظاہرہ کرتے ہوئے 55 گیندوں پر 6 چوکوں اور 3 چھکوں کی بدولت 79 رنز کی شاندار اننگز کھیلی۔

کپتان بابراعظم کے بلے نے بھی رنز اگلے اور انہوں نے 52 گیندوں پر 6 چوکوں اور 2 چھکوں کی مدد سے 68 رنز کی اننگز کھیلی۔

دوسری جانب بہترین بولنگ پرفارمنس پر شاہین شاہ آفریدی کو میچ کا بہترین کھلاڑی قرار دیا گیا۔