تین ملکی ٹی ٹوئنٹی سیریز کے لئے پاکستان کرکٹ ٹیم نے نیوزی لینڈ کے سرد موسم میں ٹریننگ کا آغاز کردیا۔
پاکستان کرکٹ بورڈ (پی سی بی) کی جانب سے جاری ہونے والی تصاویر میں دیکھا جاسکتا ہے کہ پاکستانی کھلاڑی بیٹنگ کوچ محمد یوسف کی نگرانی میں ٹریننگ کر رہے ہیں۔
حال ہی میں بیماری سے صحتیاب ہونے والے فاسٹ بولر نسیم شاہ نے بھی ٹریننگ سیشن میں شرکت کی۔
اس سے قبل نیوزی لینڈ کرکٹ ٹیم نے بھی لنکن ہائی پرفارمنس سینٹر میں بھرپور ٹریننگ سیشن کیا۔
پاکستان، نیوزی لینڈ اور بنگلادیش کے درمیان سہ ملکی سیریز کل سے نیوزی لینڈ کے گراؤنڈ ہیگلے اوول میں کھیلی جائے گی۔
سیریز کے پہلے میچ میں کل پاکستان اور بنگلادیش کی ٹیمیں مد مقابل ہوں گی جبکہ ہفتے کو نیوزی لینڈ اور پاکستان کی ٹیمیں آمنے سامنے ہوں گی۔
قومی ٹیم کے کپتان بابر اعظم کا سیریز سے متعلق کہنا ہے کہ نیوزی لینڈ میں سہ ملکی سیریز سے پاکستان کو بہت فائدہ ہوگا۔
انہوں نے کہا کہ نیوزی لینڈ اور بنگلادیش کے خلاف میچز سے ٹی ٹوئنٹی ورلڈکپ کی تیاری میں معاونت ملے گی، ٹی ٹوئنٹی انٹرنیشنل کرکٹ میں کوئی بھی ٹیم آسان نہیں ہوتی۔