وزیر آباد میں سابق وزیرِ اعظم، چیئرمین پی ٹی آئی عمران خان پر قاتلانہ حملے کی تحقیقات جاری ہیں۔
پولیس کی جانب سے ملزم نوید کو مقدمے میں باضابطہ گرفتار کر لیا گیا ہے۔
پولیس کے مطابق ایس ایچ او تھانہ سوہدرہ امتیاز احمد کو مقدمے کا تفتیشی آفیسر مقرر کر دیا گیا ہے۔
پولیس کا یہ بھی کہنا ہے کہ ملزم کو آج ہی کچھ دیر بعد انسدادِ دہشت گردی کی عدالت میں پیش کیا جائے گا۔
واضح رہے کہ 3 نومبر کو لانگ مارچ کے دوران وزیر آباد میں قاتلانہ حملے میں سابق وزیرِ اعظم عمران خان فائرنگ سے زخمی ہوگئے تھے۔
واقعے میں ایک شخص جاں بحق اور پی ٹی آئی چیئرمین عمران خان و دیگر رہنماؤں سمیت 13 افراد زخمی ہوئے تھے۔
فائرنگ کرنے والے شخص نوید کو بعد میں کنٹینر کے قریب سے پکڑ لیا گیا تھا جس نے عمران خان پر فائرنگ کا اعتراف بھی کیا تھا۔