میرے سارے اثاثے ڈکلیئرڈ اور ٹیکس شدہ ہیں، مونس الٰہی

June 07, 2023

فائل فوٹو

سابق وفاقی وزیر چوہدری مونس الٰہی نے کہا ہے کہ میڈیا اور سوشل میڈیا سے پتا چل رہا ہے میرے خلاف ایک نئی ایف آئی آر کاٹی گئی ہے،کہا جارہا ہے کہ میں نے سوا 5 کروڑ کی منی لانڈرنگ کی ہے۔

اپنے بیان میں انہوں نے کہا کہ پہلے نیب نے میرے اثاثوں کی چھان بین کی اور عدالت میں کہا سارے اثاثے جائز ہیں، پھر انہی اثاثوں پر ایف آئی اے نے پرچہ کیا جو ہائی کورٹ سے خارج ہوگیا۔

مونس الٰہی کا کہنا تھا کہ میرے سارے اثاثے ڈکلیئرڈ اور ٹیکس شدہ ہیں، اثاثوں کی تفصیل ہر سال ایف بی آر اور الیکشن کمیشن میں جمع کرائی جاتی ہیں۔

ان کا مزید کہنا تھا کہ سوا 5 کروڑ کا جو الزام لگایا جارہا ہے اس کی وضاحت میں نے کچھ دن پہلے بھی دی تھی، یہ رقم ڈکلیئرڈ ہے، میرے بینک اکاؤنٹ میں جمع ہوئی اور میری ملکیت ہے۔

چوہدری مونس الٰہی نے کہا کہ اس رقم کا پورا منی ٹریل میری ٹیکس ریٹرن میں موجود ہے۔