وزیر داخلہ رانا ثناء اللّٰہ کا کہنا ہے کہ 9 مئی کو ہونے والے واقعات کے ماسٹر مائنڈ تحریک انصاف کے چیئرمین ہیں۔
جیو نیوز کے پروگرام ’آج شاہزیب خانزادہ کے ساتھ‘ میں گفتگو کرتے ہوئے رانا ثناء نے کہا کہ انفارمیشن کی بنیاد پر کہہ سکتا ہوں کہ یہ سارا کچھ چیئرمین تحریک انصاف کی اپنی آواز میں موجود ہے۔
وزیر داخلہ نے مزید کہا کہ وہ ایسی گفتگو کر رہے ہیں کہ عدالت کو بھی شاید درخواست کرنی پڑے کہ اس گفتگو اور ثبوت کو ان کیمرہ ریکارڈ کیا جائے۔
رانا ثناء اللّٰہ نے کہا کہ پی ٹی وی پر حملہ کس نے کیا تھا؟ اس شخص نے اب زمان پارک میں بیٹھ کر سازش تیار کی، کس نے 2014 میں ریاست کے خلاف نافرمانی کی تحریک کی بات کی تھی، چند لوگوں کو زمان پارک میں تربیت دی گئی۔
وزیر داخلہ نے کہا کہ یہ شخص کہتا تھا کہ اس کا گرفتار ہونا ریڈ لائن ہے، یہ شخص کہتا تھا اس کو گرفتار کیا گیا تو ریاست کو تہس نہس کر دے گا، یہ کہتے ہیں ان کے ساتھ سیاسی ورکر کے طور پر برتاؤ کیا جائے ایسا نہیں ہوگا۔
ان لوگوں نے لائن کراس کر دی، اب یہ سیاسی اور انسانی حقوق کی بات کرتے ہیں، ان لوگوں کے تانے بانے بیرونی قوتوں کے ساتھ ملتے ہیں، انکوائری کو مکمل کرنے میں وقت لگے گا، جس کے خلاف جو شواہد ملیں گے کارروائی ہوگی، بغیر ثبوت لوگوں کو نہیں پکڑا جائے گا۔