اسلام آباد (اے پی پی، جنگ نیوز)وفاقی وزیر اطلاعات، نشریات، قومی ورثہ و ثقافت عطاء اللہ تارڑ نے کہا ہے کہ خصوصی سرمایہ کاری سہولت کونسل (ایس آئی ایف سی) کے اجلاس سے اتحاد کا پیغام گیا کہ ملکی ترقی کیلئے وفاق اور اکائیاں ایک پیج پر ہیں، میرے بھائی علی امین گنڈا پور نے وفاق کو مکمل تعاون کی یقین دہانی کرائی ہے،معاشی اشاریئے مثبت ہو رہے ہیں، بیرون ممالک سے پاکستان میں سرمایہ کاری کیلئے رقوم مختص کی جا رہی ہیں، مہنگائی 38 فیصد سے کم ہو کر 17 فیصد پر آ گئی ہے، آئندہ ماہ اس میں مزید کمی متوقع ہے۔ یہ بات انہوں نے ہفتہ کوایس آئی ایف سی اجلاس کے بعد میڈیا سے گفتگو کرتے ہوئے کہی۔ وفاقی وزیر اطلاعات نے کہا کہ ایس آئی ایف سی کا اجلاس اچھے اور خوشگوار ماحول میں ہوا، اجلاس میں ملکی معیشت، سرمایہ کاری میں اضافے، پبلک پرائیویٹ پارٹنر شپ کے حوالے سے تفصیلی گفتگو ہوئی۔ انہوں نے کہا کہ تمام صوبائی وزراءنے اجلاس میں اپنی قیمتی رائے کا اظہار کیا ہے، ان کے تعاون سے ہی یہ فورم آگے بڑھے گا۔ وفاقی وزیر نے کہا کہ وزیراعظم شہباز شریف نے سرمایہ کاری اور تجارت کو فروغ دینے کیلئے ایس آئی ایف سی کے اندر چین، متحدہ عرب امارات، سعودی عرب، قطر، یورپی یونین، امریکہ اور مشرق بعید کیلئے علیحدہ ڈیسک قائم کرنے کی ہدایت کی ہے جسے تمام وزراءاعلیٰ نے سراہا ہے۔ انہوں نے کہا کہ ایس آئی ایف سی کے آج کے اجلاس کے ثمرات آنے والے دنوں میں نظر آئیں گے۔ انہوں نے کہا کہ سیاست میں سیاسی لوگوں سے بات چیت رہنی چاہئے۔ ایک سوال کے جواب میں انہوں نے کہا کہ تمام وزارتوں کی کپیسٹی بلڈنگ کی جائے گی، اس مقصد کے لئے وزارتوں کے اندر کنسلٹنٹس ہائر کئے جائیں گے۔ انہوں نے کہا کہ فرسٹ وومن بینک سمیت دیگر اداروں کی نجکاری کے حوالے سے بات چیت چل رہی ہے، انشاءاللہ چیزیں مزید بہتر ہوں گی۔