اسلام آباد (مہتاب حیدر) ملکی تاریخ میں منفرد اور پہلی بار آئی ایم ایف نے یہ عام کرنے کو ترجیح دی ہے کہ مشن نئے بیل آؤٹ پیکیج کے لیے پاکستان کی درخواست پر ابتدائی نتائج کی بنیاد پر حتمی فیصلہ کرنے کے لیے اپنے ایگزیکٹو بورڈ کے سامنے پیش کرنے کے لیے ایک رپورٹ تیار کرے گا۔ پاکستان کے معاملے میں آئی ایم ایف کی جانب سے ماضی میں اپنائے گئے طرز عمل میں یہ کبھی نہیں کیا گیا کیونکہ مشن کی تشخیص کو خفیہ طریقے سے مینجمنٹ اور بورڈ آف فنڈ کے ساتھ شیئر کیا گیا لیکن اسے کبھی بھی عام نہیں کیا گیا۔ اس بار اس طرز عمل کو یکسر تبدیل کر دیا گیا اور یہ بالکل منفرد ہے کہ آئی ایم ایف نے واضح کر دیا کہ فنڈ مینجمنٹ کی منظوری کے ساتھ مشن پاکستانی حکام کے ساتھ کسی بھی قرض کے معاہدے کے لیے باضابطہ مذاکرات شروع کرنے کے لیےبحث اور فیصلے کے لیے ایگزیکٹو بورڈ کے لیے ایک رپورٹ تیار کرے گا۔ عام طور پر آئی ایم ایف کے مشن کے بعد دونوں فریق بیان یا کسی عملے کی رپورٹ کی جانچ پڑتال کرتے تھے لیکن کیا اس بار ایسا کیا گیا ہے، اس کا کوئی سرکاری موقف دستیاب نہیں ہے۔ وزیر خزانہ، وفاقی سیکرٹری خزانہ اور وزارت خزانہ کے ترجمان کو سوالات بھیجے گئے لیکن کوئی جواب نہیں ملا۔ آئی ایم ایف عوامی طور پر بیان کرتا ہے کہ "مشن کے اختتام کی پریس ریلیز میں آئی ایم ایف کے عملے کی ٹیموں کے بیانات شامل ہیں جو کسی ملک کے دورے کے بعد ابتدائی نتائج کو پہنچاتے ہیں۔ اس بیان میں بیان کردہ خیالات آئی ایم ایف کے عملے کے ہیں اور ضروری نہیں کہ وہ آئی ایم ایف کے ایگزیکٹو بورڈ کے خیالات کی نمائندگی کریں۔ اس مشن کے ابتدائی نتائج کی بنیاد پر، عملہ ایک رپورٹ تیار کرے گا جو انتظامی منظوری سے مشروط، بحث اور فیصلے کے لیے آئی ایم ایف کے ایگزیکٹو بورڈ کے سامنے پیش کی جائے گی۔