کراچی(نیوز ڈیسک) پاکستان تحریک انصاف حکومت کے سابق وزیر چوہدری فواد حسین نے بھارتی دارالحکومت دہلی کے وزیر اعلیٰ اروند کیجریوال کی ایکس پوسٹ شیئر کی اوربھارت کے عام انتخابات پر تبصرہ کرتے ہوئے کہا کہ امن اور ہم آہنگی، نفرت اور انتہا پسندی کی قوتوں کو شکست دے سکتی ہے۔اس پر ردعمل دیتے ہوئے اروند کیجریوال نے کہا کہ چوہدری صاحب، میں اور میرے ملک کے لوگ ہمارے مسائل کو سنبھالنے کی پوری صلاحیت رکھتے ہیں۔ آپ کے ٹویٹ کی ضرورت نہیں ہے۔ اس وقت پاکستان کے حالات بہت خراب ہیں۔ آپ اپنے ملک کا خیال رکھیں۔یہ پہلا موقع نہیں جب چوہدری فواد حسین نے بھارتی سیاست اور انتخابات پر بات کی ہو، چار مئی کو چوہدری فواد حسین نے ایکس پر ایک پوسٹ شیئر کی جس میں راہول گاندھی کی تعریف کی گئی کہ وہ اقتدار میں آنے پر دولت کی دوبارہ تقسیم کا سروے کرانے کے کانگریس کے وعدے پر ہیں۔انہوں نے گاندھی کا اپنے پردادا اور بھارت کے پہلے وزیر اعظم جواہر لال نہرو سے بھی موازنہ کیا اور کہا کہ دونوں سوشلسٹ تھے۔25 مئی کو اروند کیجریوال کی پوسٹ پر فواد چوہدری نے ایک نہیں بلکہ دو پوسٹس میں جواب دیا۔ان کا کہنا تھا کہ ’وزیر اعلیٰ صاحب! بے شک انتخابی مہم آپ کا اپنا مسئلہ ہے ،لیکن امید ہے کہ آپ انتہا پسندی کو سراہیں گے نہیں چاہے وہ پاکستان میں ہو یا بھارت میں، یہ چیز ہر ایک کے لیے خطرناک ہے خواہ وہ بنگلہ دیش ہو، بھارت ہو یا پاکستان، اس لیے ضمیر رکھنے والے ہر ایک کو فکر مند ہونا چاہیے۔