فیصل آباد میں پیٹرولنگ پولیس اہلکاروں کی فائرنگ سے نوجوان کی ہلاکت کے معاملے کا مقدمہ مقتول کےبھائی کی مدعیت میں تھانہ ڈجکوٹ میں 4 پٹرولنگ پولیس اہلکاروں کےخلاف درج کرکے انہیں حراست میں لے لیا گیا ہے۔
پولیس رپورٹ کے مطابق ڈجکوٹ میں ناکے پر گاڑی نہ رکنے پر اہلکاروں نے وقاص احمد پرفائرنگ کی، اہلکاروں نے پیچھا کرکے وقاص کی کار کو روکا اور اسے باہر نکال کر گولی ماری۔
پولیس رپورٹ میں کہا گیا ہے کہ وقاص کی کار کا ٹائر اے ایس آئی شاہد رسول کے پاؤں پر چڑھ گیا تھا، اہلکاروں نےمشتعل ہو کر بندوقیں تان لیں، وقاص نے خوفزدہ ہو کر کار دوڑا دی تھی۔
واقعے کے خلاف مقامی افراد اور ورثا نے ٹائِر جلا کر احتجاج کیا جس کے بعد فائرنگ کرنے والے پیٹرولنگ پولیس کے اہلکاروں کو حراست میں لے کرتحقیقات شروع کر دی گئی ہیں۔
واضح رہے کہ اہلکاروں کی فائرنگ سے ایک کار سوار جاں بحق جبکہ تین افراد زخمی ہو گئے تھے۔