قومی اسمبلی میں اپوزیشن لیڈر اور پاکستان مسلم لیگ نون کے صدر شہباز شریف نے مطالبہ کیا ہے کہ آئی ایم ایف سے مذاکرات کی ناکامی کے بعد حکومت قیمتوں میں اضافہ واپس لے۔
لاہور سے جاری کیئے گئے ایک بیان میں قومی اسمبلی میں اپوزیشن لیڈر اور پاکستان مسلم لیگ نون کے صدر شہباز شریف کا کہنا ہے کہ حکومت نے پہلے مہنگائی کر دی اور اب آئی ایم ایف سے مذاکرات بھی ناکام ہو گئے۔
انہوں نے کہا کہ آئی ایم ایف کی تمام شرائط پہلے ہی مان لی گئیں، پھر بھی مذاکرات ناکام ہو گئے، یہ ہے حکومت کی حکمتِ عملی؟
شہباز شریف کا کہنا ہے کہ 3 سال سے آئی ایم ایف کی اندھی تابعداری کر کے عوام کو مہنگائی سے لہو لہان کر دیا گیا اور پھر بھی نتیجہ صفر رہا۔
انہوں نے کہا کہ حکومت نے عوام کو دھوکا دیا اور آئی ایم ایف کو بھی چکر دیا، 3 سال سے عوام کا معاشی قتل جاری ہے۔
صدر نون لیگ کا مزید کہنا تھا کہ نواز شریف کی قیادت میں نون لیگ نے 2015ء میں آئی ایم ایف پروگرام مکمل کیا تھا، ہمارے دور میں آئی ایم ایف پروگرام پر عمران نیازی تنقید کیا کرتے تھے۔
شہباز شریف نے یہ بھی کہا کہ حکومت اپنی نا اہلی سے مایوسی پھیلا کر ریاست اور شہریوں کے رشتے کو کمزور کر رہی ہے، حکمران ٹولے کی عوام دشمن پالیسیاں انتہائی پریشان کن ہیں۔