نوری المالکی دوبارہ وزیر اعظم بنےتو کردستان کو علیحدہ کردینگے،برزانی

عراق کے شمالی صوبہ کردستان کے صدر مسعود برزانی نے خبردار کیا ہے کہ اگر نوری المالکی نے دوبارہ عراق کے وزیر اعظم کا منصب سنبھالا تو وہ علیحدہ مملکت کا اعلان کردیں گے۔

عرب اخبار کو دئیے گئے انٹرویو میں کردستان کے صدر مسعود برزانی نے کہا کہ وہ سمجھتے ہیں کہ عراقی حکومت میں وزیر خزانہ ہوشیار زیباری جو انکے قریبی ساتھی اور رشتہ دار بھی ہے کو سازش کے تحت ہٹایا گیا ہے جس کا مقصد موجودہ وزیر اعظم حیدر العبادی اور موصل آپریشن کی ساکھ کو نقصان پہنچانا اور نوری المالکی کو دوبارہ وزیر اعظم بننے کے لئے راہ ہموار کرنا ہے۔

تاہم انہوں نے واضح طور پر کہا جس وقت المالکی وزیر اعظم بنائے جائیں گے تو اسی لمحے وہ کردستان کو علیحدہ مملکت بنانے کا اعلان کردیں گے ، چاہے نتائج کچھ بھی ہو۔ یاد رہے کہ وزیر خزانہ ہوشیار زیباری کو بدعنوانی کے الزام میں ستمبر 2016 میں عہدے سے ہٹایا گیا تھا، جس پر انہوں نے حکمران جماعت حزب الدعوہ کو فرقہ وارانہ اور بدعنوان جماعت قرار دے دیا تھا۔