بھارت میں شادی کی تقریب میں سلنڈر پھٹنے سےاٹھارہ افرادہلاک

بھارت میں شادی کی تقریب میں سلنڈر پھٹنے سےاٹھارہ افرادہلاک اور متعدد زخمی ہوگئے ۔اس سے قبل یہ تعداد نو بتائی جارہی تھی۔

بھارتی میڈیاکے مطابق ریاست راجستھان کے اہم شہر اجمیر کے علاقے بیوار میں شادی کی تقریب کے دوران ایک سلنڈر سے دوسرے سلنڈر میں گیس بھرنے کے دوران آگ لگ گئی۔

لمحوں میں آگ نے بھیانک شکل اختیار کرلی اور یکے بعد دیگرے 3سلنڈردھماکے سے پھٹ گئے۔دھماکے اتنے شدید تھے کہ آس پاس کی 12عمارتوں میں دراڑیں پڑگئیں۔دھماکے سے 2منزلہ عمارت زمین بوس ہوگئی ۔

ملبے میں متعدد لوگوں کے دبے ہونے کا امکان ہے ۔ فائر بریگیڈ کی متعدد ٹیمیں امدادی کارروائیوں میں مصروف ہیں۔وزیر اعلی وسندھرا راجے نے اس حادثے پر افسوس کا اظہار کیا ۔ ضلع کلکٹر گورو گریٹر نے مرنے والوں کے اہل خانہ کو 50،50ہزار روپے اور زخمیوں کو 10،10ہزار روپے ریلیف فنڈ سے جاری کرنے کا اعلان کیا۔