حفیظ دورۂ بنگلہ دیش سے دستبردار

قومی کرکٹ ٹیم کے آل راؤنڈر محمد حفیظ دورۂ بنگلہ دیش سے دستبردار ہوگئے۔

ٹی ٹوئنٹی ورلڈ کپ کے بعد قومی کرکٹ ٹیم کا دورۂ بنگلہ دیش شیڈول ہے تاہم ذرائع کا بتانا ہے کہ سینئر پلیئر محمد حفیظ اس ٹور کیلئے نوجوانوں کو موقع فراہم کرنا چاہتے ہیں۔

ذرائع کا کہنا ہے کہ محمد حفیظ کی جگہ افتخار احمد کو اسکواڈ میں شامل کر لیا گیا ہے۔

دبئی ورلڈ کپ سیمی فائنل کے بعد محمد حفیظ فیصلے سے بورڈ کو آگاہ کریں گے۔

پاکستان کرکٹ ٹیم نے بنگلہ دیش میں 3 ٹی ٹوئنٹی اور دو ٹیسٹ میچز کی سیریز کھیلنی ہے۔

واضح رہے کہ پاکستان کرکٹ ٹیم ٹی ٹوئنٹی ورلڈ کپ کے فوری بعد دبئی سے ہی بنگلہ دیش روانہ ہو گی، تاہم ورلڈ کپ جیتنے کی صورت میں روانگی کے شیڈول میں ردوبدل ممکن ہے ۔

پی سی بی کا کہنا ہے کہ ٹیم کے دبئی سے ہی بنگلہ دیش روانگی کے شیڈول میں تبدیلی قابل غور نہیں ہے جبکہ ذرائع کا کہنا ہے کہ ٹیم کے ٹرافی جیت جانے کی صورت میں روانگی کے شیڈول میں ردوبدل ممکن ہے۔

ذرائع کا کہنا ہے کہ ممکن ہے قومی ٹیم چارٹر طیارے سے پاکستان سے ہوتے ہوئے ڈھاکا جائے ۔

دوسری جانب پی سی بی کا کہنا ہے کہ قومی ٹیم کی 15 نومبر کو ڈھاکہ روانگی شیڈول ہے، ٹیم کی روانگی کے پلان میں کوئی تبدیلی زیر غور نہیں، پاکستان اور بنگلہ دیش کے درمیان پہلا ٹی ٹوئنٹی میچ 19 نومبر کو ہو گا ۔

واضح رہے کہ پاکستان ٹی ٹوئنٹی ورلڈکپ کے سیمی فائنل میں پہنچنے والی پہلی ٹیم ہے اور ورلڈ کپ کا فائنل 14 نومبر کو شیڈول ہے۔