• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گوادر کے عوام سراپا احتجاج‘ حکمران طفل تسلی تک محدود‘بلوچستان بار

میرا شہر
کوئٹہ
01 دسمبر ، 2021
کوئٹہ(اسٹاف رپورٹر)بلوچستان بار کونسل کے وائس چیئرمین قاسم علی گاجزئی، چیئرمین ایگزیکٹو کمیٹی ایوب ترین، ممبران بار کونسل راحب خان بلیدی ایڈووکیٹ اور امان اللہ کاکڑ نے گوادر کو حق دو تحریک کی حمایت کا اعلان کرتے ہوئے کہا ہےکہ گوادر کے عوام عرصہ دراز سے احتجاج پر ہیں لیکن حکومت کی جانب سے طفل تسلی کے علاوہ آج تک کوئی اقدام نہیں اٹھایا گیا، گزشتہ دنوں ہزاروں کی تعداد میں خواتین نے ریلی نکالی جوبلوچستان کی تاریخ کی سب سے بڑی ریلی تھی‘اس کے باوجود بھی گوادر کے مسائل جوں کے توں ہیں۔ بیان میں کہا گیاکہ گوادر کے ماہی گیروں کو نان شبینہ کا محتاج بنادیا گیا ،غیر قانونی ٹرالنگ کا سلسلہ جاری ہے جس کے خلاف بلوچستان بار کونسل کے وائس چیئرمین قاسم علی گاجزئی کے نام سے ہائیکورٹ میں رٹ پٹیشن دائر ہے۔ انہوں نے کہا کہ اس وقت گوادر کے عوام بنیادی ضروریات زندگی سے محروم ہیں جبکہ سی پیک پروجیکٹ سے وہاں کے عوام کو آج تک کوئی فائدہ نہیں پہنچا ۔گوادر کے نوجوان آج بھی ڈگریاں لئے در بدر اورغیر مقامی افراد کو نوکریوں سے نوازا جارہا ہے ۔گوادر کے عوام آزادانہ طور پر اپنے گھروں محلوں اورساحل تک نہیں جاسکتے ۔حکومت گوادر کے عوام کے جائز مطالبات کو تسلیم کرے ۔بلوچستان بار کونسل گودار کے عوام اور تحریک کے سربراہ مولانا ہدایت الرحمان بلوچ کے ساتھ ہے۔
تازہ ترین