سندھ بار کونسل کے سیکریٹری کا قتل، پولیس کو اسلحے کی فارنزک رپورٹ مل گئی

کراچی کے علاقے گلستان جوہر میں سندھ بار کونسل کے سیکریٹری عرفان مہر کے قتل کی واردات میں استعمال ہونے والے اسلحے کی فارنزک رپورٹ پولیس کو مل گئی۔

رپورٹ کے مطابق دہشت گردوں نے واردات میں 30 بور کا پستول کا استعمال کیا۔ 

موقع سے ملنے والے خول ماضی کی کسی واردات سے مماثلت نہیں رکھتے۔

تفتیشی ٹیم کا کہنا ہے کہ قتل ان کے آبائی علاقے میں تنازعے کا شاخسانہ ہوسکتا ہے۔

کراچی: سیکریٹری سندھ بار کونسل قاتلانہ حملے میں جاں بحق

کراچی کے علاقے گلستان جوہر میں بچی کو اسکول چھوڑنے جانے والے سیکریٹری سندھ بار کونسل کو کار پر فائرنگ کر کے قتل کر دیا گیا۔

واضح رہے کہ کراچی کے علاقے گلستانِ جوہر میں سندھ بار کونسل کے سیکریٹری عرفان مہر کو نامعلوم مسلح موٹر سائیکل سواروں نے فائرنگ کرکے قتل کردیا تھا۔ 

دو موٹر سائیکل سواروں نے عرفان مہر کو اس وقت نشانہ بنایا، جب وہ بچوں کو اسکول چھوڑ کر واپس آرہے تھے۔

اس وقت ان کا بھتیجا بھی کار میں تھا، جس نے سیٹ کے نیچے جھک کر جان بچائی۔

دوسری جانب عرفان مہر کے قتل کا مقدمہ ان کے بھائی کی مدعیت میں درج کرلیا گیا۔