ذوالفقار علی بھٹو کے یوم پیدائش پر شیری رحمٰن کا پیغام

پیپلز پارٹی کی نائب صدر اور سینیٹر شیری رحمٰن کا کہنا ہے کہ بھٹو خاندان، کارکنان اور تمام پاکستانیوں کو پیپلز پارٹی کے بانی شہید ذوالفقار علی بھٹو کا 94واں یوم پیدائش مبارک ہو۔

سماجی رابطے کی سائٹ ٹوئٹر پر کیے گئے سلسلہ وار ٹوئٹس میں شیری رحمٰن نے کہا کہ 5 جنوری 1928ء کے دن سر شاہ نواز بھٹو کے گھر پیدا ہونے والے ذوالفقار علی بھٹو دنیا کے عظیم رہنمائوں میں شامل ہوئے۔

انہوں نے کہا کہ شہید ذوالفقار علی بھٹو نے عوام کو سیاسی شعور دیا اور ان کو ملکی فیصلوں میں شراکت داری دی، یہی وجہ ہے لوگوں نے ان کو قائد عوام کا خطاب دیا۔

ان کا یہ بھی کہنا تھا کہ قائد عوام نے ملک کو متحد رکھنے کے لئے جمہوری آئین دیا اور وطن کی حفاظت کے لئے جوہری پروگرام کا آغاز کیا، پیپلز پارٹی کی قیادت اور کارکنان کو شہید ذوالفقار علی بھٹو کے تاریخی کارناموں اور کامیابیوں پر فخر ہے۔

شیری رحمٰن نے کہا کہ پیپلز پارٹی شہید ذوالفقار علی بھٹو کے آئین، منشور اور نظریات پر قائم ہے، پارٹی اپنے قیام سے آج تک مزدوروں، غریبوں اور محنت کشوں کی آواز ہے۔