• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

مونال ریسٹورنٹ سیل کرنے کیخلاف اپیل مسترد

تازہ ترین
قومی خبریں
16 فروری ، 2022


سپریم کورٹ آف پاکستان نے مونال ریسٹورنٹ سیل کرنے کے خلاف اپیل پر سماعت کرتے ہوئے اسلام آباد ہائی کورٹ کا فیصلہ معطل کرنے کی استدعا مسترد کر دی۔

عدالتِ عظمیٰ کے جسٹس اعجاز الاحسن کی سربراہی میں جسٹس منیب اختر اور جسٹس مظاہر علی اکبر نقوی پر مشتمل 3 رکنی بینچ نے کیس کی سماعت کرتے ہوئے وفاقی حکومت اور فریقین کو نوٹس جاری کر دیے۔

مونال کے وکیل مخدوم علی خان نے عدالت کو بتایا کہ سی ڈی اے نے تحریری حکم سے پہلے ہی مونال کو سیل کر دیا۔

مونال ریسٹورنٹ کو آج ہی سیل کرنے کا حکم

اسلام آباد ہائی کورٹ نے مارگلہ ہلز نیشنل پارک میں تجاوزات کے خلاف کیس کی سماعت کے دوران مارگلہ پارک میں قائم مونال ریسٹورنٹ کو آج ہی سر بمہر (سیل) کرنے کا حکم دے دیا۔

جسٹس اعجاز الاحسن نے کہا کہ جو کچھ ہو چکا ہے اسے فی الحال واپس نہیں کر سکتے۔

مونال کے وکیل نے کہا کہ سی ڈی اے اور مونال کا تنازع سول عدالت میں زیرِ التواء ہے، اسلام آباد ہائی کورٹ نے مقدمہ زیرِ التواء ہونے کے باوجود فیصلہ سنا دیا۔

جسٹس مظاہر نقوی نے استفسار کیا کہ کیا اسلام آباد ہائی کورٹ نے مروجہ طریقۂ کار سے ہٹ کر فیصلہ کیا ہے؟

مونال کے وکیل نے بتایا کہ شواہد ریکارڈ کیے بغیر ہی اسلام آباد ہائی کورٹ نے فیصلہ جاری کیا، مونال ریسٹورنٹ تو کیس میں فریق ہی نہیں تھا، ہائی کورٹ نے سوموٹو لیتے ہوئے مونال کو سیل کرنے کا حکم دیا، مونال سیل کرنے کی استدعا کسی درخواست گزار نے نہیں کی تھی۔

یہ بھی پڑھیے

عدالتِ عظمیٰ نے کیس کی مزید سماعت آئندہ ہفتے تک ملتوی کر دی۔

واضح رہے کہ گزشتہ روز سپریم کورٹ آف پاکستان نے نیشنل پارک (مارگلہ ہلز) پر تعمیر کیے گئے مونال ریسٹورنٹ کو سیل کرنے کے اسلام آباد ہائی کورٹ کے حکم کے خلاف دائر اپیل کی سماعت کے دوران اپیل گزار کے وکیل کی استدعا منظور کرتے ہوئے متعلقہ آفس کو کیس کا نمبر لگانے کی ہدایت کرتے ہوئے مزید سماعت آج تک ملتوی کی تھی۔

قومی خبریں سے مزید