خاتونِ اول تہمینہ درانی نے شہباز شریف کی تقریبِ حلف برداری میں شرکت کیوں نہیں کی؟

13 اپریل ، 2022

پاکستان کی خاتونِ اول اور نومنتخب وزیراعظم شہباز شریف کی اہلیہ تہمینہ درانی نے ایوانِ صدر میں منعقدہ شوہر کی حلف برداری کی تقریب میں شرکت نہ کرنے کی وجہ بتا دی۔

تہمینہ درانی سے ایک حالیہ انٹرویو میں میزبان کی جانب سے انہیں مبارکباد دیتے ہوئے سوال کیا گیا کہ آپ نے حلف برداری کی تقریب میں شرکت نہیں کی؟ کیا آپ لاہور میں ہی ہیں؟

انہوں نے اپنی پاکستان میں موجودگی سے متعلق سوال کو نظر انداز کیا اور اپنی بات جاری رکھتے ہوئے کہا کہ تقریبِ حلف برداری میں شرکت کے لیے اتنے لوگوں میں میرے جانے کی کوئی ضرورت نہیں تھی ۔

تہمینہ درانی نے کہا کہ جہاں انہیں میری ضرورت ہوتی ہے وہاں میں ضرور ان کے ساتھ ہوتی ہوں۔

انہوں نے میزبان سے کہا کہ آپ نے مجھے مبارکباد تو دے دی لیکن آپ مبارکباد کے ساتھ بہت دعائیں بھی دیں۔

خاتونِ اول نے کہا کہ جس موڑ پر اس وقت ہمارا ملک کھڑا ہوا ہے، اس موڑ پر میاں شہباز شریف کے کاندھوں پر ہی پہاڑ نہیں آ گرا بلکہ کچھ ذمہ داریاں میری بھی بڑھ گئی ہیں۔

انہوں نے کہا کہ چاہے تھوڑی دیر کیلئے آئے ہوں ہم یا زیادہ دیر کے لیے لیکن ہم اس وقت کے لیے جوابدہ ہونا ہوگا۔

خاتونِ اول نے بتایا کہ ان کی میاں محمد شہباز شریف سے شادی کو 19 برس ہوگئے ہیں اور اس دوران انہوں نے ان سے زیادہ غریب نواز، ہر چیز کو دیکھنے والا، ایک سیکنڈ کا آرام نہیں کرنے والا نہیں دیکھا۔

اسی دوران انہوں نے یہ انکشاف بھی کیا کہ جتنا عرصہ وہ وزیراعلیٰ پنجاب رہے میں انہیں کبھی کبھار ہی دیکھتی تھی، وہ اپنی بھاگ دوڑ میں لگے رہتے تھے۔

انہوں نے کہا کہ شہباز شریف پر اللہ کا کرم ہوا ہے، یہ کوئی بادشاہت نہیں ملی انہیں بلکہ یہ ایک بہت بڑی نوکری ہے، دعا ہے کہ وہ اپنی نوکری کو اچھی طرح نبھا سکیں اور غریبوں کے لیے کام کرسکیں۔

خاص رپورٹ سے مزید