پولیس وردی جیسے کپڑے پہنے ملزم کی دودھ کی دکان میں ڈکیتی

کراچی میں پی ای سی ایچ ایس میں پولیس یونیفارم سے ملتے جلتے کپڑے پہنے ملزم نے دودھ کی دکان لوٹ لی، سی سی ٹی وی کی مدد سے پولیس ملزم کو ڈھونڈ رہی ہے۔

پی ای سی ایچ ایس بلاک 6 میں اکیلے مسلح ڈاکو نے افطار کے وقت دودھ کی دکان لوٹ لی، واقعے کی سی سی ٹی وی فوٹیج منظر عام پر آگئی ہے۔

مسلح ڈاکو نے پولیس یونیفارم سے ملتے جلتے کپڑے پہن رکھے ہیں، مسلح ڈاکو نے شناخت چھپانے کے لئے ماسک پہنا ہوا ہے، واقعے کے وقت دکاندار افطار کر رہے تھے، ملزم کیش کاؤنٹر سے نقد رقم نکال کر باآسانی فرار ہوجاتا ہے۔

پولیس حکام کا واقعے سے متعلق کہنا ہے کہ شبہ ہے کہ دکان لوٹنے والا ڈاکو پولیس اہلکار ہے، سی سی ٹی وی ویڈیو کی مدد سے ملزم تک جلد پہنچ جائیں گے۔