ملک میں مہنگائی کے طوفان نے شہریوں کو جکڑ لیا

11 مئی ، 2022

ملک میں مہنگائی کا طوفان آگیا، اشیائے ضروریہ کی چیزوں کی بڑھتی قیمتوں نے شہریوں کو جکڑ لیا۔

مختلف شہروں میں آٹا، گھی، مرغی، دالیں، سبزیاں اور پھل سمیت ہر چیز مہنگی ہونے کے باعث شہریوں کو مشکلات کا سامنا ہے۔

راولپنڈی میں سرکاری نرخ نظر انداز کر کے چینی اوپن مارکیٹ میں کہیں 90 تو کہیں 95 روپے میں دستیاب ہے۔ سرکاری گندم کا کوٹا بند ہونے کے بعد 20 کلو آٹے کا تھیلا 1300 سے 1350 روپے میں فروخت کیا جارہا ہے۔ پشاور میں اسپیشل آٹے کا بیس کلو کا تھیلا 1400 روپے اور سپر فائن آٹے کا 20 کلو کا تھیلا 1500 روپے کا ہوگیا۔

دوسری جانب قیمتیں کم ہوتے ہی ملتان کے یوٹیلٹی اسٹورز پر آٹا، چینی اور گھی غائب ہوگیا، جس کے باعث شہریوں کو مشکلات کا سامنا کرنا پڑرہا ہے۔