کاربن ڈائی آکسائیڈ اور بڑھتے ہوئے خطرات

حذیفہ احمد

کاربن ڈائی آکسائیڈ کے سالمے (مالیکیول) میں آکسیجن کے دو اور کاربن کا ایک ایٹم ہوتا ہے۔ ایسے تین ایٹمی سالمے سورج کی توانائی جذب کرتے ہیں۔ یہی وجہ ہے کہ کاربن ڈائی آکسائیڈ گرین ہاؤس ایفکٹ پیدا کرتی ہے جو گلوبل وارمنگ کی سب سے بڑی وجہ ہے۔ فوسل فیول مثلا کوئلہ، تیل اور گیس جلانے سے ہر سال 25 بیلین ٹن کاربن ڈائی آکسائیڈ پیدا ہوتی ہے۔ خیال رہے کہ ہوا میں موجود آبی بخارات بھی کاربن ڈائی آکسائیڈ کی طرح سورج کی روشنی جذب کر کے کرہ ہوائی کو گرم کرتے ہیں اور کرہ ہوائی میں آبی بخارات کی مقدار کاربن ڈائی آکسائیڈ سے کہیں زیادہ ہوتی ہے۔

اگر کاربن ڈائی آکسائیڈ کو سرد کیا جائے تو یہ مائع نہیں بنتی بلکہ منفی C° 78.51 پر براہ راست ٹھوس میں تبدیل ہو جاتی ہے جسے خشک برف dry ice کہتے ہیں ،کیوں کہ گرم ہونے پر یہ برف نہ گیلی ہوتی ہے اور نہ پگھلتی ہے بلکہ دوبارہ گیس بن کر اُڑ جاتی ہے۔ اس عمل کو عمل تصعید( sublimation )کہتے ہیں۔ ہاں اگر دباؤ 5.1‎ atm سے زیادہ ہو تو خشک برف بھی گیلی ہو جاتی ہے، کیوں کہ اس دباؤ پر کاربن ڈائی آکسائیڈ مائع حالت اختیار کر سکتی ہے۔

کاربن ڈائی آکسائیڈ کو ماحول دشمن گیس کہا جا تا ہے ۔سائنس دانوں کا کہنا ہے کہ فضامیں کار بن ڈائی آکسائیڈ کی مقدار میں دن بہ دن اضافہ ہورہا ہے۔امریکی ریاست ہوائی میں واقع ایک تجربہ گاہ کےماہرین کے مطابق پہلے ہی کاربن ڈائی آکسائیڈ کی مقدار 400 حصے فی دس لاکھ مالیکول سے تجاوز کر چکی ہے ۔اس کا مطلب یہ ہوا کہ فضا کے ہر دس لاکھ مالیکیولوں میں سے 400 کاربن ڈائی آکسائیڈ کے ہیں ۔مائونالوا نامی آتش فشاں میں واقع اسٹیشن 1958 ء سے اب تک کاربن ڈائی آکسائیڈ کا ریکارڈ رکھ رہا ہے۔ سائنس دانوں کے مطابق اُس وقت ماحول آج کے مقابلے میں خاصا گرم تھا۔

کاربن ڈائی آکسائیڈ کے بارے میں خیال کیا جاتا ہے کہ یہ انسانوں کی پیدا کردہ سب سے اہم گرین ہائوس گیس ہے جو حالیہ عشروں میں زمین کے درجہ ٔ حرارت میں اضافے کا باعث رہی ہے ۔ انسان، کوئلہ ،گیس اور تیل جلاکر یہ گیس پیدا کرتے ہیں جو فضا میں جمع ہو جاتی ہے۔ جنگلات اور پودے اس گیس کو فضا سے جذب کرلیتے ہیں ۔ہوائی میں واقع تجربہ گا ہ کے سر براہ جیمز بٹلر کے مطابق اس ماحول دشمن گیس کی مقدار ہر گھنٹے ،روزانہ ، ہر ہفتے اور ہر مہینے بدلتی رہتی ہے ۔

2015 ء میں فضا میں کاربن ڈائی آکسائیڈ کی بڑھتی ہوئی مقدار کے حوالے سے عالمی موسمیاتی ادارے (world meteorological organization) کی جانب سے ایک رپورٹ تیار کی گئی تھی ،جس میں انکشاف کیا گیا تھا کہ 2015 ء پہلا سال ہے ،جس میں فضا میں کاربن ڈائی آکسائیڈ کے اخراج کی شرح 400 حصے فی ملین کی اوسط تک پہنچ گئی تھی۔ اس ماحول دشمن گیس کی بڑھتی ہوئی شرح نے دنیا کو ایل نینو فیکٹر کی پریشان کن صورت حال سے دوچار کردیا تھا ۔ ڈبلیو ایم او کی رپورٹ کے مطابق موسمیاتی تبدیلیوں کی وجہ سےایل نینو فیکٹر جنگلات اور سمندر وں میں کاربن کو جذب کرنے کی صلاحیت کم کردیتا ہے۔

عالمی موسمیاتی ادارے کے سیکریٹری جنرل پیٹری ٹالاس کاکہنا ہے کہ جیسے جیسے جنگلات اور سمندروں میں کاربن ڈائی آکسائیڈ کو جذب کرنے کی صلاحیت بہتر ہوتی جاتی ہے اس کا مطلب یہ ہوتا ہے کہ فضا میں کاربن ڈائی آکسائیڈ کی مقدار میں کمی آناشروع ہوگئی ہے ۔لیکن کاربن ڈائی آکسائیڈ کے اخراج کو کم کیے بغیر ہم موسمیاتی تبدیلیوں کے اثرات سے باہر نہیں نکل سکتے اور اس کے لیے ہمیں عالمی درجہ ٔ حرارت کو انڈسٹریل دور سے پہلے کے در جہ ٔ حرارت، یعنی موجودہ در جہ ٔ حرارت سے دو ڈگری سینٹی گریڈ کم پر لانا ہو گا ۔ ماہرین کے مطابق ستمبر کے مہینے میں کاربن کے اخراج کی شرح کم ہو جاتی ہے ۔سائنس دانوں نے یہ پیش گوئی کی ہے کہ فضا میں کاربن کی شرح چار سو پارٹس فی ملین سے نیچے لانے کے لیے کئی نسلوں تک انتظار کرنا پڑے گا ۔

چند سال قبل کی جانے والی تحقیق سے پتا چلا ہے کہ زمین کی فضا میں مضر گیس کا ربن ڈائی آکسائیڈ کی سطح انسانی تاریخ میں بلند ترین سطح پر پہنچ گئی ہے ۔ماحولیاتی سائنس دانوں کے مطابق زمینی فضا کو آلودہ کرنے میں انسانوں کا اہم کردار ہے ۔امریکا میں قائم اسکپس انسٹی ٹیوٹ برائے اوشنو گرافی کے مطابق زمین کی بالائی سطح میں کاربن ڈائی آکسائیڈ کی مقدار 415 فی ملین مالیکیول پائی گئی ہے ۔تحقیق کے مطابق ماحول دشمن گیس کی یہ سطح انسانی تاریخ میں بلند ترین ہے ۔ماہرین کے مطابق کرہ ٔ ارض پر اس کی بلند ترین سطح موسم خزاں ،سرما اور بہار میں ہوتی ہے ۔اسکپس انسٹی ٹیوٹ برائے اوشنو گرافی کے ڈائر یکٹر رالف کیلنگ کا کہنا ہے کہ کرہ ٔ ارض کے بالائی ماحول میں کاربن ڈائی آکسائیڈ کے شامل ہونے کا موجودہ رجحان رواں برس بر قرار رہنے کے قوی اشارے موجود ہیں اور اس ر جحان کی وجہ سے زمین کو موسمیاتی ایل نیٹو ایفیکٹ کا سامنا کرناہوگا اور اس کے باعث کئی علاقوں کو انتہائی زیادہ درجہ ٔ حرارت ،غیر معمولی بارشوں اور خشکی کا سامنا کرنے پڑے گا۔

رالف کیلنگ کے مطابق گزشتہ برس کے مقابلے میں2019 ء میں زمینی فضا میں کاربن ڈائی آکسائیڈ کے شامل ہونے کی شرح تین حصے فی دس لاکھ رہے گی ۔اگر اس ماحول دشمن گیس کے فضامیں شامل ہونے کی شر ح بڑھتی رہی تو اگلی صدی کے اوائل میں کاربن ڈائی آکسائیڈ کی شرح ایک ہزارحصے فی دس لاکھ مالیکیول تک پہنچ جائے گی ۔ اس گیس کے اخراج نےکرہ ٔ ارض کے بالائی ماحول کو آلودہ کردیا ہے ۔یادرہے کہ انیسویں صدی کے صنعتی انقلاب سے قبل زمینی فضا میں کاربن ڈائی آکسائیڈ کی موجودگی کی شر ح تین سو حصےفی دس لاکھ تھی ۔2013 ء میں اس ماحول ِدشمن گیس نے چار سو حصےفی دس لاکھ کی حد عبور کی تھی۔ 

سائنسی تحقیق نے اس حقیقت سے پردہ اُٹھا یا ہے کہ تین ملین سال سے زائد عر صے پہلے بھی زمین کی بالائی فضا میں کاربن ڈائی آکسائیڈ کی سطح میں غیر معمولی اضافہ ہورہا تھا، لیکن اُس وقت موجودہ درجہ ٔ حرارت کے مقابلے میں زمین کا درجۂ حرارت تین سے چار ڈگری زیادہ پایا گیا تھا ۔کاربن ڈائی آکسائیڈ کی بڑھتی ہوئی مقدارہماری غذائوں کی تاثیر کو بھی متاثر کررہی ہیں ۔ماہرین کا کہنا ہے کہ صحت مند غذائیں، جیسے پھل اور سبزیاں،اپنی غذائیت کھو رہی ہیں ۔چوں کہ پودوں کو افزائش کے لیے کاربن ڈائی آکسائیڈ کی ضرورت ہوتی ہے، لہٰذا عام طور پر سمجھا جاتا تھا کہ فضا میں جتنی زیادہ کاربن ڈائی آکسائیڈ ہوگی اتنی ہی زیادہ پودوں کے لیے فائدے مند ہوگی،تاہم نئی تحقیق میں دیکھا گیا ہے کہ کاربن کی زیادہ مقدار پودوں کو نقصان پہنچا رہی ہے۔

تحقیق کے مطابق کاربن کی زیادتی کی وجہ سے غذائی پودے اپنی غذائیت کھو رہے ہیں ۔ان پودوں میں موجود اہم معدنیات جیسے پوٹا شیئم ،کیلشیئم ،آئرن ،زنک اور پروٹین کم ہوتے جارہے ہیں جب کہ کاربو ہائیڈریٹ کی مقدار زیادہ ہورہی ہے ۔ ماہرین کے مطابق صنعتی انقلاب سے قبل فضا میں 10 لاکھ کے مقابلے میں 180 ذرّات کاربن کے ہوتے تھے لیکن اب کاربن کے ذرّات کی تعداد 400 سے زائد ہوگئی ہے اور اگر صورت حال یہی رہی تو 2050 ء تک یہ تعداد 550ہو جائے گی ۔ایک اندازے کے مطابق ان اثرات سے 80 کروڑ افراد متا ثر ہوسکتے ہیں۔ سائنس دانوں کے مطابق بڑھتی ہوئی آبادی کی غذائی ضروریات پوری کرنے کے لیے بچے کھچے جنگلات کو بھی کاٹ کر زراعت کی جائے گی ،یوں کاربن کے اخراج میں اضافہ ہو گا ،کیوں کہ اسے جذب کرنے کے لیے درختوں میں کمی آتی جائے گی ۔

ماہرین کاربن ڈائی آکسائیڈ کے پھیلنے سے متعلق ابہام ختم کرنے کی کوشش کررہے ہیں ۔ انسان فضا میں کاربن ڈائی آکسائیڈ کی مقدار بڑھا کر اس نظام میں عدم توازن پیدا کر رہا ہے ۔ اس وقت انسانی سرگرمیوں کے باعث ہر سال فضا میں تقریباً 40 ارب ٹن کاربن ڈائی آکسائیڈ کا اضافہ ہوتا ہے، جس کی سب سے بڑی وجہ حیاتیاتی ایندھن کا جلنا ہے۔یورپ مستقبل میں مشاہدہ کرنے والے ایسے سیٹلائٹس کا جال بچھانے کا منصوبہ بنا رہا ہے، جس سے وسیع تر علاقے کا تفصیل سے مشاہدہ کیا جا سکے گا ۔