بلاول بھٹو کا دورۂ گوانگژو کیسا رہا؟

وزیر خارجہ بلاول بھٹو زرداری کا کہنا ہے کہ گوانگژو کا دورہ خوشگوار رہا، چینی وزیر خارجہ وانگ یی سے ملاقات ہوئی۔

سماجی رابطے کی سائٹ ٹوئٹر پر جاری اپنے بیان میں بلاول بھٹو نے کہا کہ ہم نے پاکستان اور چین کے پائیدار تعلقات کے 71 برس کی تکمیل کا جشن منایا، چینی وزیر خارجہ وانگ یی سے باہمی دلچسپی کے امور پر تبادلہ خیال ہوا۔

بلاول بھٹو زرداری نے کہا کہ چینی اسٹیٹ قونصلر سے گفتگو میں اقتصادی روابط میں فروغ، تجارت اور سرمایہ کاری پر بات ہوئی۔

ان کا یہ بھی کہنا تھا کہ میں نے چینی اسٹیٹ قونصلر کا زبردست استقبال اور مثالی مہمان نوازی پر شکریہ ادا کیا۔

چینی باشندوں پر حملہ کرنیوالوں کو کیفر کردار تک پہنچائیں گے، وزیر خارجہ بلاول

وزیر خارجہ بلاول بھٹوزرداری کا کہنا ہے کہ بے قصور چینی باشندوں کو نشانہ بنانے کی مذمت کرتے ہیں، یقین دلاتے ہیں چینی باشندوں پر حملہ کرنے والوں کو جلد کیفر کردار تک پہنچائیں گے۔

خیال رہے بلاول بھٹو زرداری نے گوانگژو میں چینی ہم منصب سے ملاقات کی تھی۔

دونوں رہنماؤں کی مشترکہ پریس کانفرنس میں بلاول بھٹو زرداری نے کہا تھا کہ پاک چین دوستی وقت کے ساتھ مزید مضبوط ہو رہی ہے، پاکستان ون چائنا پالیسی پر یقین رکھتا ہے۔