فرمان الہی
نماز کے اوقات
ایشیا کپ ہاکی ٹورنامنٹ 2022 میں جاپان کے خلاف اہم میچ 12ویں کھلاڑی کو کھلانے اور اس کی وجہ سے قیمتی گول سے محروم ہو کر شکست سے دوچار ہونے کی ذمہ داری قبول کرتے ہوئے ہیڈکوچ قومی ہاکی ٹیم نے معافی مانگ لی۔
اپنے ویڈیو پیغام میں قومی ٹیم کے ہیڈکوچ سیگفرائیڈ ایکمین نے کہا کہ جاپان کے خلاف میچ میں ہر منٹ میں تبدیلی کی جاری تھی، ٹیم مینجمنٹ کی جانب سے بہت بڑی کوتاہی ہوئی۔
ساتھ ہی اُنہوں نے یہ بھی کہا کہ کھلاڑیوں کو علم تھا کہ کس وقت تک میدان میں رہنا ہے اور کس کھلاڑی کو کس وقت میدان سے باہر آنا ہے۔
ایکمین نے کہا کہ بحیثیت کوچ میں اس کی ذمہ داری قبول کرتا ہوں، اس کوتاہی کے باعث ہم ورلڈکپ کے لیے کوالیفائی نہ کرسکے۔
قومی ٹیم کے کوچ کا کہنا تھا کہ اُمید کرتے ہیں کہ ٹیم کامن ویلتھ گیمز میں اچھے کھیل کا مظاہرہ کرے گی۔
سیگفرائیڈ ایکمین نے کہا کہ پاکستانی شائقین بھی افسردہ ہیں، بارہویں کھلاڑی والی غلطی نہیں بلنڈر تھا، ہم ایشیا کپ کے فائنل فور اور ورلڈکپ سے باہر ہونے پر مایوس ہیں۔
انہوں نے کہا کہ ایونٹ میں صرف ایک میچ ہارے جبکہ ایک گول کے مارجن سے پیچھے رہ گئے۔
سیگفرائیڈ ایکمین کا کہنا تھا کہ جب میں آیا تو پاکستان ہاکی تنزلی کی جانب تھی، چیزیں اتنی جلدی ٹھیک نہیں ہوں گی۔
انہوں نے یہ بھی کہا کہ ہمیں کم میچز ملتے ہیں، 35 سے 40 میچز سالانہ کھیلنے چاہیے، میچز ملنے سے ہی ہمارے کھلاڑیوں کو تجربہ ہوگا۔
