لاہور ہائی کورٹ: بشریٰ بی بی کے بھائی کو اینٹی کرپشن کی انکوائری میں شامل ہونے کا حکم

لاہور ہائی کورٹ نے سابق وزیراعظم عمران خان کی اہلیہ بشریٰ بی بی کے بھائی احمد مجتبیٰ کو اینٹی کرپشن کی انکوائری میں شامل ہونے کا حکم دے دیا۔

لاہور ہائی کورٹ کے جسٹس محمد شان گل نے احمد مجتبیٰ کی اینٹی کرپشن میں طلبی کے خلاف درخواست پر سماعت کے دوران طلبی کا نوٹس معطل کرنے کی استدعا رد کردی۔

عدالت نے بشریٰ بی بی کے بھائی احمد مجتبیٰ کی درخواست بھی نمٹا دی۔

لاہور ہائی کورٹ نے اینٹی کرپشن کو انکوائری مکمل ہونے تک تادیبی کارروائی سے بھی روک دیا اور حکم دیا کہ احمد مجتبیٰ جوائنٹ انویسٹی گیشن ٹیم کے روبرو 13 جولائی کو پیش ہوں۔

عدالت نے ریمارکس دیے کہ اگر تفتیش کا نتیجہ سائل کے حق میں ہوا تو شکایت نہیں رہے گی، اگر تفتیش کا نتیجہ خلاف ہوا تو قانون اپنا راستہ اختیار کرے گا۔

درخواست میں موقف اپنایا گیا کہ درخواست گزار کبھی پبلک آفس ہولڈر نہیں رہا، نہ ہی فراڈ میں ملوث ہے۔