تیراکی صحت کیلئے مفید کیوں؟

27 جولائی ، 2022

باقاعدگی سے ورزش اور صحت مند غذا اچھی صحت کی کنجی ہیں، ماہرین تجویز کرتے ہیں کہ بالغوں کو ہر ہفتے کم از کم 150 منٹ اعتدال پسند اور 60 منٹ کی بھرپور ورزشی سرگرمیاں اپنانی چاہئیں، تیراکی ان مقاصد کو حاصل کرنے کا بہترین طریقہ ہے۔

تیراکی ناصرف موسمِ گرما میں جسم کا درجۂ حرارت کم کرنے میں مددگار ہوتی ہے بلکہ یہ جسم کو فٹ اور صحت مند بھی رکھتی ہے۔

تیراکی کے بہت سے فوائد ہیں، اسے روزمرہ کے معمولات میں شامل کرنا چاہیے۔

تیراکی کے فوائد:

پورے جسم کی ورزش

تیراکی کا سب سے بڑا فائدہ یہ ہے کہ یہ پورے جسم کے لیے کام کرتی ہے اور طاقت بڑھانے، قوت برداشت بڑھانے اور وزن کم کرنے میں مدد کرتی ہے۔

اگر 1 گھنٹے تک تیراکی کی جائے تو یہ دوڑنے یا سائیکل چلانے سے زیادہ کیلوریز کم کر سکتی ہے، پانی پٹھوں کو نرم مزاحمت فراہم کرتا ہے، جس سے وہ سخت محنت کرتے ہیں۔

اندرونی اعضاء کیلئے بہترین عمل

تیراکی دل اور پھیپھڑوں کے لیے بے حد مفید ہے، اس سے بلڈ پریشر کم رہتا ہے اور پھیپھڑوں کو توانائی ملتی ہے، تیراکی سے دل کی صحت کے متعلق بہت سارے مطالعات کیے گئے ہیں جس سے پتہ چلا ہے کہ یہ ورزش دل کے دورے یا فالج سے موت کے خطرے کو کم کرتی ہے۔

جوڑوں اور پٹھوں کے درد میں مفید

ماہرینِ صحت کا خیال ہے کہ تیراکی جوڑوں اور پٹھوں کے درد کو بہتر بنا سکتی ہے اور صحت یابی کے عمل کو تیز کر سکتی ہے۔

ایک مطالعے سے پتہ چلتا ہے کہ اوسٹیو آرتھرائٹس کے شکار لوگوں نے تیراکی کرنے کے بعد جوڑوں کے درد اور سختی میں نمایاں کمی کے بارے میں بتایا ہے، تیراکی اور سائیکلنگ جیسی سرگرمیوں میں مشغول ہونے کے بعد درد میں کمی محسوس کی جاتی ہے۔

پرسکون نیند کیلئے مفید

تیراکی نیند کو منظم کرنے میں مدد کرتی ہے، جو لوگ بے خوابی کا شکار ہیں وہ اپنی نیند کے حوالے سے پریشانیوں کو دور کر سکتے ہیں کیونکہ ورزش ناصرف دماغ کے پٹھوں کو پُرسکون کرنے میں مدد دیتی ہے بلکہ زندگی اور نیند کے معیار کو بڑھاتی ہے۔