ہم عدالت انتخابات ملتوی کروانے نہیں گئے تھے: خالد مقبول صدیقی

19 اگست ، 2022

ایم کیو ایم پاکستان کے کنوینر ڈاکٹر خالد مقبول صدیقی کا کہنا ہے کہ ہم عدالت میں انتخابات کو ملتوی کروانے نہیں بلکہ صاف اور شفاف انتخابات کے انعقاد کے لیے گئے تھے۔

کراچی میں ایم کیو ایم پاکستان کے عارضی مرکز بہادر آباد میں پریس کانفرنس کرتے ہوئے ان کا کہنا ہے کہ گزشتہ 14 سال سے سندھ پر ایک حکومت نافذ ہے۔

خالد مقبول صدیقی نے کہا کہ سندھ حکومت کی جانب سے کی گئی حلقہ بندیاں سپریم کورٹ کےفیصلے کے بر خلاف ہیں۔

یہ بھی پڑھیے

انہوں نے کہا کہ حکومت شہری سندھ اور کراچی پر حکومت کرنے میں ناکام ہو چکی ہے، 28 اگست سے پہلے حلقہ بندیاں درست نہیں کی گئیں تو نتائج تسلیم نہیں کریں گے۔

خالد مقبول صدیقی نے کہا کہ سپریم کورٹ کےفیصلے میں درج ہے کہ حلقہ بندیاں کرنا الیکشن کمیشن کا کام ہے، ایم کیوایم کسی بھی الیکشن میں ایک دن کی بھی تاخیر نہیں چاہتی۔

انہوں نے مزید کہا ہے کہ کراچی اور حیدر آباد کو حلقہ بندیوں میں لسانی بنیادوں پر تقسیم کیا گیا ہے، کہیں تو 90 ہزار پر حلقہ بنایا گیا ہے جبکہ کہیں پر 25 سے 30 ہزار پر حلقہ بندی کی گئی۔

ایم کیو ایم پاکستان کے کنوینر نے یہ بھی کہا ہے کہ جہاں ہمارے ووٹرز ہیں وہاں کی حلقہ بندی زیادہ ووٹرز پر رکھی گئی ہے، یہ انتخابات سے پہلے کی گئی دھاندلی ہے۔

قومی خبریں سے مزید