پاک فوج کے شعبۂ تعلقاتِ عامہ (آئی ایس پی آر) نے بتایا ہے کہ پاک فوج کا 1 ہیلی کاپٹر گزشتہ شب بلوچستان میں فلائنگ مشن کے دوران گر کر تباہ ہو گیا۔

آئی ایس پی آر کے مطابق حادثے میں 2 پائلٹس سمیت ہیلی کاپٹر میں سوار تمام 6 فوجی اہلکار شہید ہو گئے۔

پاک فوج کے شعبۂ تعلقاتِ عامہ نے بتایا ہے کہ شہداء میں پائلٹ میجر محمد منیب افضل، پائلٹ میجر خرم شہزاد شامل ہیں۔

آئی ایس پی آر نے یہ بھی بتایا ہے کہ ہیلی کاپٹر حادثے کے نتیجے میں شہید ہونے والوں میں نائیک جلیل، صوبیدار عبدالواحد، سپاہی محمد عمران اور سپاہی شعیب بھی شامل ہیں۔

ہیلی کاپٹر حادثہ: وزیرِ اعلیٰ بلوچستان کا اظہارِ افسوس

وزیرِ اعلیٰ بلوچستان میر عبدالقدوس بزنجو نے ہرنائی میں پاک فوج کے ہیلی کاپٹر کو پیش آنے والے حادثے پر افسوس کا اظہار کیا ہے۔

جاری کیے گئے بیان میں انہوں نے کہا ہے کہ شہداء کے خاندانوں کے غم میں شریک ہیں، پوری قوم شہداء کو سلام پیش کرتی ہے۔

وزیرِ اعلیٰ بلوچستان میر عبدالقدوس بزنجو نے یہ بھی کہا ہے کہ فرائض کی ادائیگی کے دوران جانیں قربان کرنے والے شہداء قوم کی شان ہیں۔

وزیرِ اعلیٰ بلوچستان میر عبدالقدوس بزنجو نے شہداء کے درجات کی بلندی کے لیے دعا بھی کی ہے۔

قائم مقام گورنر بلوچستان کا اظہارِ رنج و غم

بلوچستان کے قائم مقام گورنر میر جان محمد جمالی نے بھی پاک فوج کے ہیلی کاپٹر کو پیش آنے والے حادثے پر اظہارِ رنج و غم کیا ہے۔

کوئٹہ سے جاری کیے گئے بیان میں قائم مقام گورنر بلوچستان میر جان محمد جمالی نے شہداء کے درجات کی بلندی کے لیے دعا بھی کی ہے۔

وزیرِ اعلیٰ پنجاب کا اظہارِ دکھ

پاک فوج کے لاپتہ ہیلی کاپٹر کا ملبہ مل گیا، سوار تمام افراد شہید ہو گئے: ISPR

پاک فوج کے شعبۂ تعلقاتِ عامہ (آئی ایس پی آر) نے بتایا ہے کہ بلوچستان کے ضلع خضدار میں پاک فوج کے لاپتہ ہیلی کاپٹر کا ملبہ مل گیا ہے۔

وزیرِ اعلیٰ پنجاب چوہدری پرویز الہٰی نے بلوچستان میں پاک آرمی کا ہیلی کاپٹر گرنے کے واقعے پر دکھ کا اظہار کیا ہے۔

لاہور سے جاری کیے گئے بیان میں وزیرِ اعلیٰ پنجاب چوہدری پرویز الہٰی نے حادثے میں شہید ہونے والوں کو خراجِ عقیدت پیش کیا ہے۔

انہوں نے شہداء کے اہلِ خانہ سے دلی ہمدردی و تعزیت کا اظہار کرتے ہوئے کہا ہے کہ شہداء کی عظیم قربانی کو کبھی فراموش نہیں کر سکتے۔