فواد چوہدری جہانگیر ترین کے حق میں بول پڑے

04 اکتوبر ، 2022

پاکستان تحریک انصاف (پی ٹی آئی) کے رہنما فواد چوہدری کا کہنا ہے کہ جہانگیر ترین کی تاحیات نااہلی نہیں بنتی تھی، تاحیات نااہلی سے متعلق قانون سازی ضروری ہے۔

اسلام آباد میں میڈیا سے گفتگو کرتے ہوئے فواد چوہدری نے کہا کہ جہانگیر ترین کی نااہلی کے بعد باتیں ہونے لگیں کہ بیلنس کرنے کے لیے ان کو نااہل کیا گیا۔

انہوں نے کہا کہ آرٹیکل 62 ون ایف کی تعریف ہونی چاہیے، نئے انتخابات کے بعد عدالتی اصلاحات کریں گے، فساد کے بغیر انتخابات کے لیے اسٹیبلشمنٹ سمیت تمام اداروں سے بات کرنا چاہتے ہیں، سیاسی جماعتیں اگر مشاورت نہیں کریں گی تو پھر اسٹیبلشمنٹ ہی کام کرے گی۔

فواد چوہدری کا کہنا ہے کہ صرف سندھ میں سیلاب سے تباہی ہوئی کیونکہ وہاں کرپشن زیادہ ہے، سندھ میں سیلاب کے لیے جو امداد کرنا تھی وہ پیسہ کرپشن میں چلا گیا، مونس الہٰی کا کیس وفاقی حکومت دیکھ رہی ہے، ججز تقرری اور ججز کو نکالنے کا طریقہ کار عدالت کے پاس نہیں ہونا چاہیے۔

پی ٹی آئی کے رہنما نے کہا کہ سائفر کی اصل کاپی وزیرِ اعظم ہاؤس اور سپریم کورٹ میں پڑی ہے، مریم نواز کو ضمانت ملی اور اسحاق ڈار واپس آئے، اس سے ہمارا نظام عدل ناکام ہو گیا ہے، ملزمان اپنے لیے قانون بنا رہے ہیں، نواز شریف کے بچوں نے اس ملک کے اربوں روپے لوٹے ہیں، اب ایسا قانون بنایا گیا ہے کہ کرپشن کے لیے نیب کو سب کچھ ثابت کرنا ہوگا۔

ان کا مزید کہنا ہے کہ جو کرپشن کرے گا اس سے کچھ نہیں پوچھا جائے گا، نواز شریف کے خلاف مقدمات ختم کرانے کی کوشش کی جارہی ہے، سپریم کورٹ اگر ایسے حالات میں نوٹس لیتی تو معاملات بہتر ہوتے، کرپشن کا سیلاب بھی سیاستدانوں نے روکنا ہے۔

سابق وفاقی وزیر نے یہ بھی کہا کہ ابھی تو یہ بھی نہیں پتہ کہ سندھ میں سیلاب آیا ہے یا لایا گیا ہے، کچھ لوگ چاہتے ہیں کہ سیلاب کی آڑ میں حکومت کو چلنے دیا جائے۔

قومی خبریں سے مزید