توشہ خانہ کیس فیصلے سے متعلق پرویز خٹک کی آڈیو وائرل

تحریکِ انصاف کے رہنما پرویز خٹک کی چیئرمین پی ٹی آئی عمران خان کے خلاف توشہ خانہ کیس کا آج فیصلہ آنے سے متعلق ایک آڈیو وائرل ہو گئی ہے۔

سابق وفاقی وزیر پرویز خٹک اس آڈیو میں توشہ خانہ کیس کا فیصلہ عمران خان کے خلاف آنے پر کارکنوں کو احتجاج کی ہدایت کر رہے ہیں۔

خیبر پختونخوا کے صوبائی صدر پرویز خٹک کا آڈیو میں کارکنوں کے نام پیغام جاری کرتے ہوئے کہنا ہے کہ الیکشن کمیشن کی جانب سے سابق وزیر اعظم عمران خان کے خلاف توشہ خانہ کیس کا فیصلہ آج سنایا جائے گا۔

توشہ خانہ کیس کا فیصلہ، الیکشن کمیشن میں کچھ دیر بعد اجلاس طلب

پاکستان تحریک انصاف (پی ٹی آئی) کے چیئرمین اور سابق وزیرِ اعظم عمران خان نااہل ہوں گے؟ کیس عدالت بھیجا جائے گا یا ختم ہو جائے گا؟ الیکشن کمیشن آف پاکستان توشہ خانہ کیس کا فیصلہ آج سنائے گا۔

پرویز خٹک کا کہنا ہے کہ توشہ خانہ کیس کا فیصلہ عمران خان کے حق میں آتا ہے تو ٹھیک ورنہ فیصلہ عمران خان کے خلاف آنے پر ضلعی سطح پر سخت احتجاج کیا جائے گا۔

واضح رہے کہ الیکشن کمیشن آف پاکستان کی جانب سے توشہ خانہ کیس کا فیصلہ آج دوپہر دو بجے سنایا جائے گا۔

اس ضمن میں متعلقہ فریقین کو نوٹسسز بھی جاری کردیے گئے ہیں۔

دوسری جانب مسلم لیگ ن کی رہنما حنا پرویز بٹ کا اس آڈیو پر ردِ عمل کا اظہار کرتے ہوئے کہنا ہے کہ پرویز خٹک نے عمران خان کے خلاف فیصلہ آنے پر انتشار پھیلانے کی تیاری کی ہدایت جاری کر دی ہے۔