فرمان الہی
نماز کے اوقات
سندھ کے ضلع گھوٹکی کی تحصیل اوباڑو کے کچے کے علاقے رونتی میں ڈاکوؤں کے پولیس پارٹی پر حملے میں ڈی ایس پی اور 2 ایس ایچ اوز سمیت شہید ہونے والے 5 اہلکاروں کی لاشیں ڈاکوؤں نے پولیس کے حوالے کر دیں۔
کئی گھنٹوں بعد ڈاکوؤں نے شہید پولیس افسران اور اہلکاروں کی لاشیں پولیس کے حوالے کیں۔
حملے میں ایک ایس ایچ او اور دیگر اہل کار زخمی بھی ہوئے ہیں۔
ایس ایچ او اوباڑو اصغر اعوان کے مطابق ڈاکوؤں کے حملے میں ڈی ایس پی اوباڑو عبدالمالک بھٹو، ایس ایچ او کھینجو دین محمد لغاری، ایس ایچ او میر پور ماتھیلو عبدالمالک اور 2 پولیس اہل کار شہید ہوئے ہیں۔
مقابلے میں ایس ایچ او رونتی غلام علی بروہی اور دیگر اہل کار زخمی ہوئے ہیں جنہیں طبی امداد کے لیے اسپتال منتقل کر دیا گیا ہے۔
ایس ایس پی اوباڑو تنویر احمد تُنیو نے میڈیا سے گفتگو میں بتایا کہ پولیس کا مورال بلند ہے، ڈاکوؤں کا جواں مردی کے ساتھ مقابلہ کیا ہے۔
ان کا کہنا ہے کہ ڈاکو جدید اسلحے سے لیس ہیں، پولیس کو بھی جدید اسلحے کی ضرورت ہے۔
ایس ایس پی اوباڑو تنویر احمد تُنیو نے یہ بھی کہا کہ شہید اہلکاروں کا خلاء پُر نہیں ہوسکتا، شہداء کے اہلِ خانہ کے دکھ میں شریک ہیں۔
ڈی آئی جی سکھر ڈویژن جاوید جسکانی کے مطابق اوباڑو کے کچے کے علاقے رونتی میں 3 مغویوں کی بازیابی کے لیے ڈی ایس پی اوباڑو عبدالمالک بھٹو کی کمانڈ میں آپریشن کیا گیا تھا۔
انہوں نے بتایا کہ آپریشن کے لیے کچے میں پولیس کیمپ بھی قائم کیا گیا تھا، جس پر ڈیڑھ سو سے زائد ڈاکوؤں نے جدید اسلحے کے ساتھ حملہ کر کے پولیس جوانوں کو ٹارگٹ کیا۔
پولیس اہلکاروں پر حملے کے بعد پولیس کی بھاری نفری کچے میں روانہ کر دی گئی ہے۔
