لاہور ہائی کورٹ نے لانگ مارچ فوری روکنے کی استدعا مسترد کردی

لاہور ہائی کورٹ نے تحریک انصاف کا لانگ مارچ فوری روکنے کی استدعا مسترد کردی۔

جسٹس جواد حسن نے رہنما انجمن تاجران پاکستان نعیم میر کی لانگ مارچ رکوانے کے لیے دائر درخواست پر سماعت کی۔

سماعت کے موقع پر جسٹس جواد حسن نے ریمارکس دیے کہ پیر کو تمام فریقین کو سن کر فیصلہ دیں گے، عدالت اسی نوعیت کے کیسز پر ماضی میں فیصلے دے چکی ہے۔

جسٹس جواد حسن نے ریمارکس دیے کہ 13 دسمبر 2021ء کے جلسے کا آرڈر میں نے ہی کیا تھا، یہ آپ کو تنگ نہیں کریں گے، احتجاج ہر ایک کا آئینی حق ہوتا ہے۔

جسٹس جواد حسن نے اپنے ریمارکس میں مزید کہا کہ ٹائم ضائع نہ کریں، مریم نواز کے جلسے سے متعلق بھی فیصلہ میں نے دیا تھا، اسی نوعیت کے فیصلے میں ہر سیاسی جماعت کو پرامن احتجاج کا حق ہونا قرار دیا گیا ہے۔

لاہور ہائیکورٹ: پی ٹی آئی کا لانگ مارچ رکوانے کیلئے درخواست دائر

انجمن تاجران کی طرف سے لاہور ہائیکورٹ میں پی ٹی آئی کا لانگ مارچ رکوانے کیلئے درخواست دائر کر دی گئی۔

جسٹس جواد حسن نے ریمارکس دیے کہ درخواست میں جن محکموں کو ہدایت کی استدعا کی گئی ان کے پاس تو اختیار ہی نہیں۔

عدالت نے وزارت داخلہ، چیف سیکریٹری، سیکریٹری داخلہ، آئی جی پنجاب کو نوٹس جاری کرتے ہوئے سماعت 14 نومبر تک ملتوی کردی۔