اسمبلی کا اجلاس کم از کم 100 دن تک ہوسکتا ہے، میاں اسلم اقبال

سینئر وزیر پنجاب میاں اسلم اقبال کا کہنا ہے کہ اسمبلی کا اجلاس کم از کم 100 دن تک ہوسکتا ہے، اسمبلی اجلاس 365 دن بھی ہو تو میڈیا کو کیا اعتراض ہے؟

لاہور میں جیو نیوز سے خصوصی گفتگو کرتے ہوئے میاں اسلم اقبال نے کہا کہ آئین کے آرٹیکل 130 کے سیکشن 7 کے تحت اجلاس کے دوران دوسرا اجلاس نہیں ہوسکتا۔

ان کا کہنا تھا کہ اسپیکر کی رولنگ پر اعتراض ہے تو کورٹ میں چلے جائیں، ان کے پاس 186 ووٹ نہیں ہیں، اگر ہیں تو گھوڑا بھی حاضر ہے، میدان بھی۔ 

صوبائی وزیر پنجاب نے کہا کہ گورنر کو کیا مسئلہ ہے ہم کابینہ میں رہیں یا نہ رہیں؟ گورنر وفاق کے کٹھ پتلی بنے ہوئے ہیں، آئین اور قانون کے مطابق نہیں چل رہے۔

انہوں نے کہا کہ اسمبلی قانون اور قاعدے کے مطابق چلنی ہے، یہ اوچھے ہتھکنڈے الیکشن میں نہ جانے کے لئے ہیں۔

میاں اسلم اقبال نے مزید کہا کہ یہ واحد اپوزیشن ہے جو چاہتی ہے الیکشن میں نہ جائیں۔