قیام پاکستان سے اب تک سربراہان مملکت کو ملے تحائف سے متعلق درخواست سماعت کیلئے مقرر

اسلام آباد ہائی کورٹ میں قیام پاکستان سے اب تک سربراہان مملکت کو بیرون ملک سے کتنے تحائف ملے؟ اس سے متعلق درخواست سماعت کے لیے مقرر کردی گئی۔

شہری ابوذر سلمان نیازی نے اسلام آباد ہائیکورٹ میں درخواست دائر کی، جو کہ کل سماعت کے لیے مقرر کردی گئی۔

اسلام آباد ہائیکورٹ کے جسٹس میاں گل حسن اورنگزیب کل سماعت کریں گے۔

درخواست گزار نے کہا کہ وزراءاعظم اور صدور کو بیرون ملک سے ملنے والے تحائف کی تفصیلات دی جائیں، تحائف کی مارکیٹ ویلیو اور لگائی گئی قیمت کی تفصیلات بھی دی جائیں۔

درخواست میں کہا گیا کہ انفارمیشن کمیشن پہلے ہی توشہ خانہ کی تفصیلات فراہم کرنے کا حکم دے چکا ہے، انفارمیشن کمیشن کے 29 جون 2022 کے فیصلے پر عملدرآمد کروایا جائے۔