اعظم سواتی متنازع ٹویٹ کیس، ریاست کو نوٹس جاری

26 دسمبر ، 2022

اسلام آباد ہائی کورٹ نے پی ٹی آئی کے سینیٹر اعظم خان سواتی کے متنازع ٹویٹ کے کیس میں ریاست کو نوٹس جاری کر دیا۔

عدالتِ عالیہ کے چیف جسٹس عامر فاروق نے سماعت کرتے ہوئے اعظم سواتی کی ضمانت بعد از گرفتاری کی درخواست پر اسٹیٹ کو نوٹس جاری کیا۔

اعظم سواتی کی جانب سے ان کے وکیل بابر اعوان عدالت کے سامنے پیش ہوئے۔

اسلام آباد ہائی کورٹ نے آئندہ پیر تک فریقین سے جواب بھی طلب کر لیا۔

واضح رہے کہ متنازع ٹوئٹس پر ایف آئی اے نے اعظم سواتی کے خلاف 26 نومبر 2022ء کو مقدمہ درج کیا تھا۔

ٹرائل کورٹ نے 21 دسمبر کو اعظم سواتی کی درخواستِ ضمانت مسترد کر دی تھی۔

اعظم سواتی نے بابر اعوان کے ذریعے اسلام آباد ہائی کورٹ میں ضمانت کے لیے دائر درخواست میں مؤقف اختیار کیا ہے کہ مبینہ ٹوئٹس پوسٹ نہیں کیں۔

درخواست میں کہا گیا ہے کہ اعظم سواتی کا کسی ادارے کو بد نام کرنے کا بھی ارادہ نہیں تھا، تفتیش مکمل ہونے کے بعد بھی پراسیکیوشن کے پاس ان کے خلاف کوئی ثبوت نہیں۔

درخواست میں مؤقف اپنایا گیا ہے کہ پٹیشنر اعظم سواتی کی عمر 75 سال ہے اور وہ عارضۂ قلب میں مبتلا ہیں، ان کے خلاف کیس دستاویزی الزامات پر مبنی ہے، انہیں جیل میں رکھنا ٹرائل سے قبل سزا کے مترادف ہو گا۔

قومی خبریں سے مزید