ہوائی جہاز ’ سولر امپلس ٹو‘ کی پنسلوانیہ سے کامیاب اُڑان

شمسی توانائی سے اُڑنے والا ہو ائی جہاز سولر امپلس ٹوایک بار پھر فضاؤں میں اُڑتے ہوئے دنیا کے گِرد چکر لگانے کیلئے تیار ہے۔

سولر امپلس ٹو گزشتہ رات پنسلوانیہ کے شہرالین ٹائون سے کامیاب اُڑان بھری اوراب اپنا سفر مکمل کر کے نیو یارک کے جان ایف کینیڈی ایئر پورٹ پر اُترے گا۔

شمسی توانائی سے اُڑنے والے اس جہاز کی یہ آخری منزل ہے، جس کے بعد سولر اِمپلس ٹو بحرِ اوقیانوس کے مشکل ترین سفر پر روانہ ہو جائیگا۔

گزشتہ برس دنیا کے گرد چکر لگانے کے مشن پر روانہ ہونے والا جہاز جولائی میں جاپان سے اڑان بھر کر جزیرہ ہوائی پہنچاتھا۔

5ہزار80پونڈ(2ہزار300کلوگرام) وزنی اس جہاز کے236فٹ چوڑے ونگ ایریا پر17ہزار248 فوٹو والٹک سیلزنصب ہیں جن کی مدد سے یہ جہاز70کلومیٹر فی گھنٹہ کی رفتار سے5سے 6دن تک بناء جیٹ فیول کے دن رات اُڑان بھرنے کی صلاحیت رکھتا ہے۔